قازاقستاندىقتار دۇكەندەر مەن بازارلاردا 6 تريلليون تەڭگەدەن استام اقشا جۇمسادى
Ranking.kz پورتالىنىڭ مالىمەتىنشە، ءبىرىنشى جارتىجىلدىقتىڭ قورىتىندىسىندا بولشەك ساۋدا كولەمى 6,1 تريلليون تەڭگەگە جەتتى. بۇل ءبىر جىل بۇرىنعى اقشالاي ماندەگى كورسەتكىشتەن 13,8 پايىزعا ارتىق. ازىق-تۇلىك تاۋارلارىنىڭ بولشەك ساۋداسى ءبىر جىلدا 7,9 پايىزعا ءوسىپ، 2 تريلليون تەڭگەگە جەتتى. ال ازىق-تۇلىككە جاتپايتىن تاۋارلار 17 پايىزعا ارتىپ، 4,1 تريلليون تەڭگەنى قۇرادى. ساۋدا كاسىپورىندارى مەن ۇيىمدارى 4,3 تريلليون تەڭگەنىڭ، جەكە كاسىپكەرلەر، ونىڭ ىشىندە بازارلاردا ساۋدا جاسايتىندار 1,8 تريلليون تەڭگەنىڭ تاۋارىن ساتتى. وڭىرلەر بويىنشا بولشەك ساۋدا تاۋارلارىنىڭ باسىم بولىگى ادەتتەگىدەي الماتىعا تيەسىلى جانە رەسپۋبليكاداعى كورسەتكىشتىڭ 30,7 پايىزىن قۇراپ وتىر. اقشامەن ەسەپتەگەندەگى كولەمى ءبىر جىلدا 10,7 پايىزعا ءوسىپ، 1,9 تريلليون تەڭگەگە جەتتى.
ەلوردا ەكىنشى ورىندا تۇر. استانادا ساۋدا- ساتتىق 16,8 پايىزعا ۇلعايىپ، 711,2 ميلليارد تەڭگەنى قۇرادى. ءۇشىنشى ورىندا تۇرعان قاراعاندى وبلىسىندا بولشەك ساۋدا 5,5 پايىزعا ءوسىپ، 506,7 ميلليارد تەڭگە بولدى.
رەسمي بولشەك ساۋدانىڭ ەڭ از كولەمى جاڭادان قۇرىلعان ۇلىتاۋ وبلىسىندا تىركەلدى، نەبارى 39 ميلليارد تەڭگە.
اۆتور مارلان جيەمباي
