ەرتە ۇيىقتاۋدىڭ 6 پايداسى

نۇر- سۇلتان. قازاقپارات - دۇرىس ۇيقى - جالقاۋلىقپەن كۇرەسۋ، اۋرۋ- سىرقاۋ مەن ارتىق سالماقتىڭ الدىن الۋ قۇرالى.

دۇرىس ۇيىقتاۋ ارقىلى ءبىز جاعىمسىز ادەتتەرىمىزدەن وڭاي ارىلىپ، ۋاقىتىمىزدى كوبەيتىپ، جاستىعىمىزدى ۇزارتا الامىز. ادام ءتۇن ورتاسىنا دەيىن، ياعني تۇنگى 3-4 كە دەيىن ۇيىقتاپ الاتىن بولسا ونىڭ كوپتەگەن ارتىقشىلىقتارى بار. تولىعىراق توقتالايىق.

1. دەنساۋلىعىڭىز مىعىم بولادى.

ەگەر ءسىز كەشكى 9 دا ۇيقىعا جاتساڭىز اۆتوماتتى تۇردە ماي باسۋدىڭ الدىن الاسىز. قان قىسىمى كوتەرىلمەيدى، باس اۋرۋى مەن شارشاعاندىق بەلگىلەرى بولمايدى. ۇيقى قانباسا ەڭ الدىمەن زارداپ شەگەتىن اعزا - باۋىر. ال ەرتەرەك ۇيىقتاساڭىز باۋىرىڭىز دا ساۋ بولماق.

2. جاسارا تۇسەسىز.

ايەل زاتى ءۇشىن ءوزىنىڭ جاس كەلبەتىن ساقتاۋ اسا ماڭىزدى. بۇل ءۇشىن كەشكى ساعات 10 نان قالماي ۇيقىعا جاتقان ءجون. بۇل ۋاقىتتا ادام اعزاسىنىڭ جاسۋشالارىندا كوللاگەن بەلسەندى تۇردە بولىنەدى. كوللاگەن - تەرىنىڭ شىمىرلىعى مەن جاسارۋىنا نەگىز بولادى. ەگەر دۇرىس ۇيىقتاۋدى ادەتكە اينالدىرساڭىز بەتىڭىزدەگى اجىمدەردىڭ ازايعانىن بايقايسىز. ءارى رەڭىڭىز دە اشىق بولادى.

3. ارتىق سالماق جينامايسىز.

امەريكالىق عالىمدار زەرتتەۋىنىڭ ناتيجەسىندە ءتۇن ورتاسىنا دەيىن ۇيىقتاماۋ اعزاداعى الماسۋ پروتسەستەرىن ورەسكەل بۇزاتىنى دالەلدەندى. سول سەبەپتى دە ادام ادەتتەگىگە قاراعاندا ەكى ەسە جىلدام سەمىرەدى.

4. اقىلىڭىز ارتادى.

ۇنەمى ۇيقىسى قانباي ءجۇرۋ - ەستە ساقتاۋ قابىلەتىن ەداۋىر تومەندەتەدى، ادامنىڭ اقپاراتتى سارالاۋ قابىلەتىن ناشارلاتادى. ءتۇن ورتاسىنا دەيىنگى ۇيقى عانا بۇل پروتسەستەردى قالىپقا كەلتىرە الادى.

5. بوس ۋاقىتىڭىز كوپ بولادى.

ەرتەرەك ۇيىقتاساڭىز ەرتەرەك تۇراسىز. ال تاڭعى ۋاقىتتا بەرەكە بار. تاڭ نامازىنان كەيىنگى ساعاتتار ءار ءىس ءۇشىن بەرەكەلى بولماق. «ەرتە تۇرعان ەركەكتىڭ ىرىسى ارتىق، ەرتە تۇرعان ايەلدىڭ ءبىر ءىسى ارتىق» دەمەكشى جۇمىس كۇنىڭىز ونىمدىرەك بولادى.

6. جاراتۋشىنىڭ جارىلقاۋى

عالامتوردى، تەلەديدار مەن تەلەفوندى ەرتەرەك ءسوندىرىپ، ەرتەرەك جاتۋداعى ەڭ ماڭىزدى دۇنيە - تاڭ نامازىنا قينالماي تۇراسىز. بۇل تاڭ نامازىنا عانا ەمەس، تۇنگى ءتاحاججۋد نامازىنا تۇرۋعا دا جەڭىل. كەشكى 9-دا ۇيىقتاۋعا جاتساڭىز، ءتۇن ورتاسى تۇنگى ۇشتەردە ۇيقىڭىز ابدەن قانىپ قالادى.

قازىر كوپشىلىك كەش جاتىپ كەش تۇرۋعا داعدىلانعان. جانە ەرتە تۇرۋعا قينالاتىن جاندار وتە كوپ. بار- جوعى ءبىر اپتانىڭ ىشىندە ەرتە تۇرۋعا داعدىلانۋعا ابدەن بولادى. ول ءۇشىن ءبىر كۇن ۇيقىڭىزدى قيىپ ەرتە تۇرىپ، ەرتە جاتساڭىز جەتكىلىكتى. جانە كەلەسى كۇندەردە دە سولاي جالعاستىرۋ قاجەت.

دۇرىس ۇيقى فورمۋلاسى. سالاۋاتتى ءومىر سالتىنا داعدىلاندىراتىن فيتنەس- جاتتىقتىرۋشىلار «10- 3- 2- 1- 0» ۇيقى فورمۋلاسىن ۇسىنادى.

ۇيقى الدىنداعى 10 ساعات: ەشقانداي كوفەين ىشۋگە بولمايدى؛

ۇيقى الدىنداعى 3 ساعات: ەشقانداي تاماق ىشپەۋ قاجەت؛

ۇيقى الدىنداعى 2 ساعات: جۇمىس ىستەمەۋ كەرەك (اسىرەسە كومپيۋتەر الدىندا)؛

ۇيقى الدىنداعى 1 ساعات: ەشقانداي ەكرانعا جول جوق؛

ۇيىقتار الدىنداعى بۇل ساعاتتاردا سەرۋەندەۋگە بولادى. سەبەبى ۇيقى الدىنداعى سەرۋەن جاقسى ۇيىقتاۋىڭىزعا كوپ كومەكتەسەدى. قۇلشىلىق جاساپ، زىكىر ايتىپ وتكىزسەڭىز تىپتەن تاماشا.