قازاقستاننىڭ ءسۇت شىعاراتىن 6 كاسىپورىنى ونىمدەرىن قىتايعا ەكسپورتتاي الادى

نۇر-سۇلتان. قازاقپارات - الماتى، اقمولا جانە قوستاناي وبلىستارىنىڭ كاسىپورىندارى ءوز ءسۇت ونىمدەرىن قىتايعا ەكسپورتتاي الاتىن بولدى، دەپ حابارلايدى اۋىل شارۋاشىلىعى مينيسترلىگى.

ق ر اۋىل شارۋاشىلىعى مينيسترلىگى مەن ق ح ر- نىڭ باس كەدەن باسقارماسى اراسىنداعى بەلسەندى ىنتىماقتاستىقتىڭ ناتيجەسىندە تاعى ءۇش قازاقستاندىق ءسۇت وڭدەۋشى كاسىپورىن قىتايعا ەكسپورتتاۋعا قۇقىعى بار كاسىپورىنداردىڭ تىزىمىنە ەندى.

ولار: «گورمولزاۆود» ج ش س (كوكشەتاۋ، اقمولا وبلىسى)، «داۋلەت-بەكەت» (تالدىقورعان، الماتى وبلىسى) جانە «ليدەر-2010» (رۋدنىي، قوستاناي وبلىسى).

پرەزيدەنت قاسىم-جومارت توقايەۆ قىركۇيەك ايىنداعى ساپارى اياسىندا بەيجىڭدە ءسۇت جانە ءسۇت ونىمدەرىن ەكسپورتتاۋعا ۆەتەريناريالىق-سانيتارلىق تالاپتار تۋرالى حاتتاماعا قول قويدى. سول كەزدە الماتىداعى فۋدماستەر، قاراعاندىداعى ​​ەۆرازيا ينۆەست LTD جانە تۇركىستانداعى Golden Camel Group LTD سياقتى ءۇش كومپانيا ءوز ونىمدەرىن كورشى مەملەكەتكە ساتۋ قۇقىعىن العان بولاتىن.

قازىرگى ۋاقىتتا ءسۇت جانە ءسۇت ونىمدەرىن وندىرەتىن 6 كاسىپورىن ءوز ونىمدەرىن قىتايعا ەكسپورتتاي الادى.