ەۋرووداق ەلدەرگە ءار ميگرانت ءۇشىن 6 مىڭ ەۋرودان ۇسىنىپ وتىر

بريۋسسەل. قازاقپارات - ەۋروكوميسسيا ە و اۋماعىنان جەرورتا تەڭىزىنەن قۇتقارىلاتىن ميگرانتتاردى جىبەرەتىن باقىلاناتىن ورتالىق قۇرۋ بويىنشا جالپى ەرەجەلەردى ۇسىندى، دەپ حابارلايدى «قازاقپارات» ح ا ا مەنشىكتى ءتىلشىسى.

ەۋروپاداعى «باقىلاناتىن ورتالىق» قۇرۋ تۇجىرىمىنىڭ يدەياسى ماۋسىم ايىنىڭ سوڭىندا وتكەن ە و سامميتىندە ماقۇلداندى. وسى ورتالىقتاردا كەلۋشىلەردىڭ قايسىسى حالىقارالىق قورعانىسقا مۇقتاج، قايسىسى دەپورتاتسيالاناتىنى تۋرالى شەشىم قابىلداناتىن بولادى.

ەۋروپالىق وداقتىڭ ءاربىر مۇشەسى ءوز اۋماعىندا مۇنداي ورتالىقتار قۇرۋ قاجەتتىلىگى تۋرالى ءوز بەتىنشە شەشىم قابىلدايدى.

ەۋرووداق، ءوز كەزەگىندە، وسىنداي مەملەكەتتەرگە قاجەتتى ينفراقۇرىلىمدى جانە وپەراتسيالىق شىعىنداردى ۇسىنىپ قانا قويماي، سونىمەن قاتار ءاربىر ميگرانت ءۇشىن 6 مىڭ ەۋرو تولەۋگە كەلىسىپ وتىر.

افريكا مەن تاياۋ شىعىس ەلدەرىنەن كەلگەن ميگرانتتاردىڭ كوبىسى جەرورتا تەڭىزى ارقىلى گرەكيا مەن يتالياعا دەيىن كەلىپ جاتىر.

ەۋروكوميسسيانىڭ ۇسىنىستارىنا «ءتۇسىرۋ پلاتفورمالارى» دەپ اتالاتىن ءۇشىنشى ەلدەرمەن ميگرانتتاردى قابىلداۋ بويىنشا ايماقتىق تەتىكتەردى جاساۋدىڭ ىقتيمال جولدارى كىرەدى. مۇنداي نىسانداردى جەرورتا تەڭىزىنىڭ افريكا ەلدەرىندە قۇرۋ جوسپارلانىپ وتىر.

«ايماقتىق تەتىكتەردىڭ ماقساتى قۇتقارىلعان ادامداردى جەرورتا تەڭىزىنىڭ ەكى جاعىنان تەز جانە ءقاۋىپسىز ءتۇسىرۋدى قامتاماسىز ەتۋ بولىپ تابىلادى»، - دەپ اتاپ ءوتتى ەۋروكوميسسيا.

ە و ءتۇسىرۋ پلاتفورمالارىن ورنالاستىرۋعا كەلىسكەن افريكا مەملەكەتتەرىنە قارجىلىق جانە وپەراتيۆتىك قولداۋ كورسەتۋگە دايىن. سونداي-اق، بريۋسسەل ولارعا شەكارالاردى، جابدىقتاردى جانە پەرسونالداردى وقىتۋعا كومەكتەسۋگە نيەتتى.