مىسىردا جوعالىپ كەتكەن قازاقستاندىق 6 ستۋدەنت تابىلدى
بۇل جايىندا ق ر سىرتقى ىستەر مينيسترلىگى باسپا ءسوز قىزمەتىنىڭ جەتەكشىسى ءانۋار جايناقوۆ فەيسبۋكتەگى پاراقشاسىندا جازدى، دەپ حابارلايدى قازاقپارات.
ءبىزدىڭ ديپلوماتتارىمىزدان مىسىردا جوعالعان قازاقستاندىق ستۋدەنتتەردى ىزدەستىرۋ ناتيجەسى بويىنشا الدىن الا اقپارات ءتۇستى. جاڭا عانا سەنىمدى كوزدەردەن الىنعان اقپارات بويىنشا اتالعان قازاقستاندىق ستۋدەنتتەردى كاير قالاسىندا قۇقىق قورعاۋ ورگاندارىنىڭ قىزمەتكەرلەرى ۇستاپ العان جانە ولار وسى ەلدىڭ اۋماعىندا. ولاردىڭ ءومىر مەن دەنساۋلىعىنا تونگەن قاتەر جوق»، - دەپ جازدى ول.
جايناقوۆتىڭ اتاپ وتۋىنشە، قازىرگى كەزدە قازاقستاننىڭ مىسىرداعى ەلشىلىگى مىسىر تارابىنان ءبىزدىڭ ازاماتتارىمىزدىڭ ۇستالۋى، قازىرگى ورنى مەن جاعدايلارى تۋرالى رەسمي جاۋاپ تالاپ ەتۋدە.
«تاياۋ ارادا قازاقستان ەلشىسى مىسىر سىرتقى ىستەر ءمينيسترىنىڭ ورىنباسارىمەن وسى ماسەلەگە بايلانىستى كەزدەسۋ وتكىزبەك. قوسىمشا اقپارات مىسىر تارابىمەن كەلىسسوزدەر ناتيجەسى بويىنشا حابارلاناتىن بولادى. وسى ماسەلە قازاقستان سىرتقى ىستەر مينيسترلىگى باسشىلىعىنىڭ ەرەكشە جانە ۇنەمى باقىلاۋىندا»، - دەدى ءانۋار جايناقوۆ.
اۆتور: مارلان جيەمباي
