قازاقستان سپورتتىڭ 6 ءتۇرى بويىنشا يسلام ويىندارىنا قاتىسادى

استانا. قازاقپارات - 12-22 - مامىر ارالىعىندا ازەربايجان استاناسى باكۋدە وتەتىن IV يسلام ىنتىماقتاستىق ويىندارىنا قازاقستان سپورتتىڭ التى ءتۇرى بويىنشا قاتىسادى.

 بۇل تۋرالى «قازاقپارات» ح ا ا ازەربايجانداعى مەنشىكتى ءتىلشىسى حابارلايدى.

35 وتاندىق سپورتشى بوكس، ەركىن كۇرەس، ايەلدەر كۇرەسى، گرەك- ريم كۇرەسى، دزيۋدو، تايەكۆوندو سىندى سپورت تۇرلەرى بويىنشا باق سىنايدى. قازاقستاندىق دەلەگاتسيا 50 ادامنان قۇرالعان، ونىڭ قۇرامىندا 10 باپكەر، دەلەگاتسيا باسشىلارى، شتاب وكىلى، دارىگەرلەر مەن باسپا ءسوز حاتشىسى بار. ءبىرىنشى دەلەگاتسيا باكۋگە 10 - مامىردا بارادى، سپورتشىلار نەگىزگى سايىستاردان 2-3 كۇن بۇرىن كەلەدى. 12- مامىر كۇنى كەشكە ويىنداردىڭ سالتاناتتى اشىلۋ شاراسى وتەدى.

ەسكە سالا كەتەيىك، يسلام ىنتىماقتاستىعى ويىندارىن وتكىزىپ تۇرۋ جونىندە شەشىم ساۋد ارابياسىندا 2013 -جىلى وتكەن يسلام ىنتىماقتاستىعى سپورت فەدەراتسياسى VIII باس اسسامبلەياسىندا قابىلدانعان. يسلام ۇيىمشىلدىق ويىندارى - يسلام ىنتىماقتاستىق ۇيىمىنا مۇشە ەلدەردىڭ قاتىسۋىمەن ءتورت جىلدا ءبىر رەت وتەتىن سپورتتىق دودا. ويىنداردىڭ باعىتى مەن باقىلاۋىنا يسلام ۇيىمشىلدىق ويىندارى فەدەراتسياسى جاۋاپتى. ۇيىمعا مۇشە ەلدەردىڭ مۇسىلمان ەمەس ازاماتتارى دا جارىسقا قاتىسا الادى.

اۆتور: ايجان سەرىكجان قىزى