الەمنىڭ 67 ەلىنىڭ ازاماتتارى قازاقستانعا ۆيزاسىز كەلە الادى
بۇل تۋرالى بۇگىن ورتالىق كوممۋنيكاتسيالار قىزمەتىندەگى بريفينگتە مادەنيەت جانە سپورت ءمينيسترى ارىستانبەك مۇحامەدي ۇلى ايتتى، دەپ حابارلايدى قازاقپارات ءتىلشىسى.
«ىشكى جالپى ونىمدەگى تۋريزم سالاسىنىڭ ۇلەسىن 2016 -جىلعى 1 پايىزدان 2025 -جىلى 8 پايىزعا دەيىن جەتكىزۋ سىندى اۋقىمدى ماقسات قويىلىپ وتىر» ، - دەدى ول.
ونىڭ ايتۋىنشا، ەلىمىز ەكسپو حالىقارالىق كورمەسىن وتەۋ ارقىلى تۋريزم سالاسىندا وڭ تاجىريبە جيناي الدى.
«ەكسپو كەزىندە قازاقستانعا 7 ميلليوننان استام ادام كەلدى. بۇل ونىڭ الدىنداعى جىلدان 18 پايىزعا جوعارى كورسەتكىش. ىشكى تۋريزم اعىنى 20 پايىزعا ءوستى. ءاربىر تۋريست ەل ەكونوميكاسىنا ءبىر كەلگەندە 50 دەن 350 دوللارعا دەيىن قاراجات قالدىرۋدا» ، - دەدى مينيستر.
وسى قارقىندى ساقتاۋ ماقساتىندا جىل باسىنان بەرى ەلەكتروندى ۆيزا ەنگىزۋ جۇمىستارى جۇرگىزىلدى. الەمنىڭ 67 ەلىنىڭ ازاماتتارى تۋريستىك ماقساتتا قازاقستانعا ۆيزاسىز- اق كەلە الادى.
«2018 -جىلدىڭ سوڭىنا دەيىن الماتى مەن استانا ارقىلى وتەتىن ق ح ر مەن ءۇندىستاننىڭ ازاماتتارى ءۇشىن 72 ساعاتتىڭ ۆيزاسىز ترانزيت ەنگىزىلدى. اتالعان رەجيمنىڭ تاياۋدا عانا ەنگىزىلگەنىن (ق ح ر ازاماتتارى ءۇشىن قاڭتاردان، ءۇندىستان ءۇشىن ءساۋىر ايىنان) ەسكەرسەك، ق ح ر مەن ءۇندىستاننان ترانزيتتىك جولاۋشىلاردىڭ اعىنى 9,8 مىڭعا جۋىق ادامدى قۇراپ، ولاردىڭ ءارقايسىسى ەل ەكونوميكاسىنا كەمىندە 350 دوللار قالدىردى» ، - دەدى ول.
ءمينيستردىڭ ايتۋىنشا، قازاقستاننىڭ رەسپۋبليكالىق تۋريستىك كارتاسىنىڭ جوباسى ازىرلەندى.
«ءبىز جوبانى جۇزەگە اسىرۋ كەزىندە تۋريستەردىڭ اعىنىن جىلىنا 13 ميلليون ادامعا دەيىن جەتكىزەمىز دەپ جوسپارلاپ وتىرمىز. مۇنان بولەك، 5,8 ميلليارد دوللار تىكەلەي ينۆەستيتسيا تارتىلىپ، 64 مىڭ تۇراقتى جۇمىس ورنى قۇرىلادى» ، - دەدى ارىستانبەك مۇحامەدي ۇلى.
