جەكەشەلەندىرۋ جوسپارى: 674 نىسان وتكىزىلەدى

نۇر- سۇلتان. قازاقپارات - ۇكىمەت وتىرىسىندا ق ر قارجى ءمينيسترى ەرۇلان جاماۋبايەۆ جەكەشەلەندىرۋدىڭ بارىسى جايىندا باياندادى، دەپ حابارلايدى قازاقپارات ءتىلشىسى.

«جەكەشەلەندىرۋدىڭ 2021-2025 -جىلدارعا ارنالعان كەشەندى جوسپارىندا مەملەكەتتىك مەنشىك پەن كۆازيمەملەكەتتىك سەكتوردىڭ 674 وبەكتىسىن وتكىزۋ كوزدەلگەن. ونىڭ ىشىندە رەسپۋبليكالىق مەنشىكتىڭ 8 وبەكتىسى، كوممۋنالدىق مەنشىكتىڭ – 448، ۇلتتىق حولدينگتەر مەن ۇلتتىق كومپانيالاردىڭ - 65 جانە الەۋمەتتىك كاسىپكەرلىك كورپوراتسياسىنا تيەسىلى 153 وبەكتى بار. ەگەر باس كومپانيالاردىڭ قۇرامىندا ەنشىلەس ۇيىمدار دا ىسكە اسىرىلاتىنىن ەسكەرە وتىرىپ، وبەكتىلەردىڭ جالپى سانى 736 نى قۇرادى»، - دەدى مينيستر.

1-اقپانداعى جاعداي بويىنشا 384 وبەكت بويىنشا وتكىزۋدىڭ جول كارتالارى ازىرلەندى جانە بەكىتىلدى. رەسپۋبليكالىق مەنشىكتىڭ 8 وبەكتىسىن وتكىزۋ بويىنشا دايىندىق ءىس- شارالارى بەلسەندى جۇرگىزىلىپ جاتىر. ونىڭ ىشىندە 7 وبەكت 2021 -جىلى، 1 نىسان 2022 -جىلى ساتىلىمعا شىعارىلادى.

«بۇگىنگى كۇنى 290 وبەكت بويىنشا جول كارتالارى ءالى بەكىتىلمەگەن. ولاردىڭ كوممۋنالدىق مەنشىكتەگىسى – 183، ۇلتتىق حولدينگتەر مەن كومپانيالاردىكى - 39 جانە الەۋمەتتىك كاسىپكەرلەر كورپوراتسيالارىنا تيەسىلى 68 نىسان بار. مەملەكەت باسشىسىنىڭ بەرگەن تاپسىرمالارىنا بايلانىستى كەشەندى جوسپاردىڭ ىسكە اسىرىلۋىن جەدەلدەتۋ قاجەت. ول ءۇشىن جەرگىلىكتى اتقارۋشى ورگاندارعا، الەۋمەتتىك كاسىپكەرلىك كورپوراتسيالارعا، ۇلتتىق باسقارۋشى حولدينگتەرگە جانە ۇلتتىق كومپانيالارعا وبەكتىلەردى وتكىزۋدىڭ جول كارتالارىن شۇعىل تۇردە ازىرلەۋدى جانە بەكىتۋدى تاپسىرۋدى سۇرايمىن. بۇل رەتتە وبەكتىلەردىڭ باسىم بولىگىن وتكىزۋ مەرزىمدەرى 2021 -جىلعا جوسپارلانۋى ءتيىس»، - دەدى ە. جاماۋبايەۆ.