ماڭعىستاۋدا جول اپاتىنان قازا بولعان بالالاردىڭ سانى 66 پايىزعا ارتقان
بۇل تۋرالى قوعامدىق كوممۋنيكاتسيا ورتالىعىندا وتكەن بريفينگتە وبلىستىق پوليتسيا دەپارتامەنتى باستىعىنىڭ مىندەتىن اتقارۋشى بولاتبەك اقشاۋوۆ ءمالىم ەتتى، دەپ حابارلايدى قازاقپارات ءتىلشىسى.
«جول-كولىك وقيعالارىنىڭ اۋىر سالدارىن ازايتۋ باستى ماقساتتاردىڭ ءبىرى بولعاندىقتان، بۇل باعىتتاعى ءىس-شارالار جۇيەلى تۇردە وتكىزىلىپ وتىردى. ناتيجەسىندە، جىل باسىنان بەرى 116638 قۇقىقبۇزۋشىلىق انىقتالىپ، ايىپپۇل سالىندى. سونداي-اق، وبلىس كولەمىندە جول-كولىك وقيعالارىنىڭ سانى بىلتىرمەن سالىستىرعاندا - 6,7 پايىز، جاراقاتتانعاندار - 19 پايىزعا تومەندەگەن. ال، قازا بولعاندار سانى 34,7 پايىز ءوسىپ وتىر. سونىمەن قاتار، بالالاردىڭ قاتىسۋىمەن تىركەلگەن جول-كولىك وقيعالارىنىڭ سانى - 13,3 پايىز، قازا تاپقاندار سانى - 66,7 پايىز ءوستى»، - دەدى بولاتبەك اقشاۋوۆ.
وبلىستىق پوليتسيا دەپارتامەنتى قوعامدىق جانە جول قاۋىپسىزدىگىن قامتاماسىز ەتۋ ماقساتىندا رەسپۋبليكالىق، وبلىستىق دەڭگەيدە 17-گە جۋىق جەدەل-پروفيلاكتيكالىق ءىس-شارا وتكىزگەن.
«سوڭعى كەزدە جول اپاتىنان ازاماتتارىمىزدىڭ، بۇلدىرشىندەرىمىزدىڭ قازاسى كوبەيۋى ءبارىمىزدىڭ جانىمىزدى اۋىرتىپ وتىر. جول اپاتى جۇرگىزۋشىلەردىڭ بەلگىلەنگەن جىلدامدىقتى شامادان تىس اسىرۋىنان، جۇرگىزۋشىلەردىڭ كولىك قۇرالىن باسقارۋ كەزىندە ۇيىقتاپ كەتۋ سالدارىنان جانە جاياۋ جۇرگىنشىلەردىڭ بەلگىلەنبەگەن جەردە جولدى كەسىپ وتۋىنەن، سونىمەن قاتار، جۇرگىزۋشىلەردىڭ جاياۋ جۇرگىنشىلەردى وتكىزبەۋىنىڭ كەسىرىنەن بولىپ جاتىر. وسىعان وراي، وبلىس تۇرعىندارى مەن قوناقتارىن جول ەرەجەسىن ساقتاپ، زاڭ تارتىبىنە باعىنىپ، قاۋىپتىڭ الدىن الۋعا شاقىرامىن»، - دەدى بولاتبەك اقشاۋوۆ.
بۇگىندە جول-كولىك وقيعالارىنىڭ الدىن الۋ ءۇشىن 21 «كيبەر شەريف» جىلدامدىق ولشەگىش قۇرىلعىسى ىسكە قوسىلىپ، ونىڭ 14 ى رەسپۋبليكالىق تاسجولدا، ۇشەۋى اقتاۋ قالاسىندا، ال ەكەۋى جاڭاوزەن مەن مۇنايلىدا جۇمىس جاساپ تۇر.
سونىمەن قاتار، جول-كولىك وقيعالارىنىڭ الدىن الۋ ماقساتىندا «سكات-پ» كوپ فۋنكسيالى جىلدامدىق ولشەۋ قۇرالدارىنىڭ 8 ى جول-كولىك وقيعالارى ءجيى بولاتىن رەسپۋبليكالىق ماڭىزداعى تاسجولداردىڭ باعىتىنا قويىلعان.
