ارنايى بورتپەن تۇركيادان قازاقستانعا 64 ادام ەۆاكۋاتسيالاندى
«گازيانتەپ قالاسىنان ارنايى بورتپەن قازاقستاننىڭ - 42، قىرعىزستاننىڭ 22 ازاماتى ەۆاكۋاتسيالاندى»، - دەپ ءمالىم ەتتى وقيعا ورنىنان اقپارات تاراتىپ جاتقان اگەنتتىك ءتىلشىسى اقجىگىت شۇكىباي.
وسى ۋاقىتتا ارنايى بورت استانا حالىقارالىق اۋەجايىنا قوندى. ەۆاكۋاتسيالانعان ادامدار پاسپورتتىق باقىلاۋدان ءوتىپ جاتىر.
ەسكە سالايىق، قازاقستان قۇتقارۋشىلارى مىنگەن بورت 7-اقپان كۇنى گازيانتەپكە قونعان بولاتىن. ماماندارىمىزدىڭ ەكىنشى توبى گازيانتەپكە كەشكە كەشقۇرىم جەتتى. قازاقستان ۇشاعىمەن العاشىندا 16 ادام ەۆاكۋاتسيالانعان بولاتىن.
قازىر تۇركياداعى جەر سىلكىنىسى كەزىندە جوعالىپ كەتكەن قازاقستاندىقتار ىزدەستىرىلىپ جاتىر. ولاردىڭ ءبىرى - سابينا مامادياروۆا 8-اقپان كۇنى كەشكە امان- ەسەن تابىلدى.
توتەنشە جاعدايلار مەن اپاتتار جونىندەگى باسقارمانىڭ (AFAD) دەرەگىنە سايكەس، 6-اقپان كۇنى كاحرامانماراش- پازاردجيك اۋدانىندا 7,7 بالل قۋاتىمەن جانە ەلبيستاندا 7,6 بالل قۋاتىمەن جەر سىلكىنگەننەن كەيىن 648 افتەرشوك بولدى. جەراستى ءدۇمپۋى ەلدىڭ 10 پروۆينسياسىندا، سونداي-اق كورشىلەس ەلدەردە، سونىڭ ىشىندە سيريادا سەزىلدى.
تۇركيا باسشىسى رەجەپ تايپ ەردوعان 10 پروۆينتسيادا 3 ايعا توتەنشە جاعداي رەجيمىن ەنگىزدى.
كەشە، 8-اقپاندا تۇرىك ەلىندە 5,4 ماگنيتۋداسىمەن تاعى ءبىر سىلكىنىس تىركەلدى. سوڭعى مالىمەتكە سايكەس، كاحرامانماراشتاعى ءزىلزالا سالدارىنان 12391 ادام كوز جۇمدى، 62914 ادام جاراقات الدى.
ال سيريا دەنساۋلىق مينيسترلىگىنىڭ سوڭعى اقپاراتىنا سۇيەنسەك، ەلدە كەم كەدەگەندە 2,5 مىڭ ادام كوز جۇمدى، 4,6 مىڭ ادام جاراقات الدى.