يزرايل - پالەستينا قاقتىعىسى: 63 بالا قۇربان بولدى

نۇر- سۇلتان. قازاقپارات - يزرايل اسكەرى مەن حاماس ۇيىمىنىڭ اراسىنداعى اۋە جانە زىمىران شابۋىلى تولاسسىز جالعاسىپ جاتقانىنا 10 كۇنگە تاياپ قالدى، دەپ حابارلايدى «حابار 24».

گازا سەكتورىنىڭ دەنساۋلىق ساقتاۋ مينيسترلىگى تاراتقان سوڭعى مالىمەت بويىنشا، قازا تاپقان پالەستينالىقتار سانى 215-كە جەتتى. اراسىندا 61 بالا مەن 36 نازىك جان بار. 1400-دەن استامى جاراقات العان.

ال يزرايل بيلىگى 12 ازاماتىنىڭ قايتىس بولعانىن حابارلادى. ولاردىڭ ەكەۋى - بالا. ساياسي تارتىستان، قارۋلى قاقتىعىستان جانجالداسقان ەكى جاقتىڭ جۇرتى بىردەي جاپا شەگىپ وتىر.

ساريت ۋايزمان، يزرايل تۇرعىنى:

- سۋعا تۇسپەك بولىپ، باسىما سۋسابىن تامىزعانىم سول ەدى، دابىل قاعىلدى. باسىمدى سۇرتپەي، سول قالپى بومبادان قورعايتىن بولمەگە قاراي جانۇشىرا جۇگىردىم. قاتتى شوشىپ كەتتىم. ونىڭ ۇستىنەن 3 ايلىق بالانى كوتەرىپ جۇرگەنىم جانە بار.

داۆيد، يزرايل تۇرعىنى:

- دابىل قاعىلعان بەتتە ءبىز 15 سەكۋند ىشىندە بومباپاناعا جەتىپ، ىشكە كىرىپ ۇلگەرىمىز كەرەك. مىنا جەرگە سوڭعى 6 كۇندە 60 رەت تىعىلعان شىعارمىز. ءتىپتى كۇنى بويى شىقپاي، وسىندا ۇيىقتايمىز.

ال پالەستينادا بومبا تاستالاتىنىن ەسكەرتەتىن دابىل جۇيەسى مەن پانالايتىن ورىندار جوق.

حاليل، گازا تۇرعىنى:

- يزرايل اسكەرىنىڭ اۋە شابۋىلدارىنان بارلىق قىزمەت كورسەتۋ جۇيەسى ىستەن شىقتى. ەلەكتر جانە ينتەرنەت جەلىلەرى مەن سۋ قۇبىرى بۇزىلىپ، تەلەكوممۋنيكاتسيا ءۇزىلدى. بۇلاردى قاشان، قالاي قالپىنا كەلتىرەدى دەگەن سۇراقتى ويلايتىن دا شاما جوق.

قۇتقارۋشىلار جاپا شەككەندەرگە كومەك كورسەتۋ ءۇشىن زاقىم كەلگەن جەرگە جىلدام جەتە الماي وتىر. تاياۋ شىعىستاعى شيەلەنىس مەديتسينا قىزمەتكەرلەرىنىڭ جۇمىسىن تىم اۋىرلاتتى.

مارۋان ابۋ سادا، وپەراتسيا ءبولىمىنىڭ مەڭگەرۋشىسى:

- بۇگىندە گازا سەكتورىندا دارىگەرلەر قوس مايداندا جۇرگەندەي. ءبىر جاعىنان كوروناۆيرۋسپەن كۇرەسىپ الەك. ەكىنشى جاعىنان قاقتىعىستىڭ سالدارىنان جاپا شەككەندەرگە مەديتسينالىق كومەك كورسەتىپ ءجۇر. قايسىسىنا ۇلگەرەتىنىن بىلمەي دال. جانساقتاۋ بولىمىندە نەبارى 10 ورىن بار. وعان قاۋىپتى ىندەتتەن ەمدەۋ ءۇشىن ناۋقاستاردى جاتقىزعان ەدى. ەندى وسى جەردە تەك يزرايل شابۋىلدارىنان جاراقات العانداردى ەمدەپ جاتىر. ءدارى- دارمەك تاپشىلىعى جىعىلعانعا جۇدىرىق بولدى. اۋرۋحانالارعا توق بەرەتىن گەنەراتورلارعا جانارماي دا جەتىسپەي جاتىر.

كەلىسىم جوق جەردە كەرىس بار. ەكى ەل اراسىندا تۇتانعان وتتى بەيبىت حالىق بەيبىت جولمەن ءسوندىرۋدى قالايدى.

ناۆاررو، يزرايل تۇرعىنى:

- ۋشىققان جاعدايدى اسكەري كۇشپەن رەتتەۋگە كەلمەس ەكەنى ايداي انىق. ءبارى بەيبىت جولمەن شەشىلۋى ءتيىس. اسىرەسە گازاداعى جاعداي تىپتەن مۇشكىل. گۋمانيتارلىق احۋال وتە اۋىر. پالەستينا تۇرعىندارىن تازا اۋىز سۋ مەن ەلەكتر جارىعىنا ءزارۋ.

يماد، گازا تۇرعىنى:

- پالەستينانىڭ ۇزدىكسىز قيراتىلىپ جاتقانىنا 15 جىلدان استى. وسى قاقتىعىستىڭ شەشىمى مۇلدە تابىلماي كەلەدى. سالدارىنان ءبىز سەكىلدى بەيبىت ادامدار جاپا شەگىپ وتىر.

ميرجام لي ميۋللەر، «قىزىل كرەست» حالىقارالىق ۇيىمى كەڭسەسىنىڭ ديرەكتورى:

- قوس تاراپ حالىقارالىق گۋمانيتارلىق زاڭنىڭ تالاپتارىن ۇستانسا يگى. ياعني ۇرىس كەزىندە ازاماتتىق ينفراقۇرىلىم نىساندارىن قيراتىپ، بەيبىت تۇرعىندار مەن مەديتسينا قىزمەتكەرلەرىنە كۇش كورسەتۋدى دوعارۋ كەرەك. ءبىراق قازىرگى جاعداي وتە قورقىنىشتى.

www.24.kz