ۇكىمەت توتەنشە جاعدايلار مينيسترلىگىنىڭ بولىمشەلەرىنە 633 ميلليون تەڭگەگە دروندار ساتىپ اپەرمەك

None
استانا. قازاقپارات - ۇكىمەت توتەنشە جاعدايلار مينيسترلىگىنىڭ بولىمشەلەرىن ارنايى قۇرىلعىلارمەن قامتاماسىز ەتۋ بويىنشا قوسىمشا شارالار قابىلداۋدا.

بۇل ماقساتتارعا ۇكىمەت رەزەرۆىنەن 633 ميلليون تەڭگەدەن استام قارجى ءبولىندى. ءتيىستى قاۋلىعا ق ر پرەمەر-ءمينيسترى ءاليحان سمايىلوۆ قول قويدى.

بۇل تۋرالى قازاقپارات ۇكىمەتتىڭ رەسمي سايتىنا سىلتەمە جاساپ حابارلادى.

قۇجاتقا سايكەس، قاراجات تابيعي جانە تەحنوگەندىك سيپاتتاعى توتەنشە جاعدايلاردى جويۋعا قاتىساتىن توتەنشە جاعدايلار مينيسترلىگىنىڭ اۋە كەمەلەرىنە 5 سۋ شاشۋ قۇرىلعىسىن جانە 71 ۇشقىشسىز ۇشۋ اپپاراتىن ساتىپ الۋعا باعىتتالاتىن بولادى.

بۇگىنگى تاڭدا ت ج م قاراماعىندا 27 ۇشقىشسىز ۇشۋ اپپاراتى بار. الايدا بيىلعى جىلى بولعان ورتتەر مەن باسقا دا توتەنشە جاعدايلار ولاردىڭ سانىنىڭ جەتكىلىكسىز ەكەنىن كورسەتتى.

سونىمەن قاتار قازىرگى ۋاقىتتا اشىق سۋ قويمالارىنان سۋ الىپ، تابيعي ءورت وشاقتارىنا اۋە ارقىلى جەتكىزۋ ءۇشىن 12 سۋ شاشاتىن قۇرىلعى بار. ت ج م اۆياتسيالىق پاركى كوپفۋنكتسيالى 34 اۋە كەمەسىنەن تۇرادى.

وسىلايشا، جاڭا دروندار مەن سۋ شاشۋ قۇرىلعىلارىن ساتىپ الۋ تابيعي جانە تەحنوگەندىك سيپاتتاعى توتەنشە جاعدايلار كەزىندە ءتيىستى بولىمشەلەردىڭ تيىمدىلىگىن ارتتىرۋعا مۇمكىندىك بەرەدى.

ەسكە سالا كەتەيىك، جىل سايىن ەلىمىزدە 1 مىڭعا جۋىق ورمان جانە دالا ورتتەرى، سونداي-اق 4 مىڭعا جۋىق تابيعي ءورت تىركەلەدى.

سوڭعى جاڭالىقتار