قىتايدان دەنە قىزۋىمەن كەلگەن 61 قازاقستاندىق اۋرۋحانادان شىعارىلدى

نۇر- سۇلتان. قازاقپارات – ق ر دەنساۋلىق ساقتاۋ مينيسترلىگىنىڭ رەسمي وكىلى دياس احمەتشارىپ 6 - قاڭتاردان كەيىن قىتايدان ورالعان تۇرعىنداردىڭ دەنساۋلىعى تۋرالى ايتتى، دەپ حابارلايدى قازاقپارات ءتىلشىسى.

«6 - قاڭتاردان باستاپ، بۇگىنگە دەيىن قازاقستانعا قىتاي مەملەكەتتىك شەكارا پۋنكتتەرى ارقىلى 30394 ادام كەلدى. 6 - قاڭتاردان 4 - اقپانعا دەيىن دەنساۋلىق ساقتاۋ مينيسترلىگى ماماندارى قىتايمەن مەملەكەتتىك شەكارا ارقىلى وتەتىن اۋەجايلار مەن تەمىرجول بەكەتتەرىندە 21838 ادامدى، ونىڭ ىشىندە 20084 جولاۋشى مەن 1814 ەكيپاج مۇشەلەرىن تەكسەردى. 29 جولاۋشىدان دەنە قىزۋى مەن جرۆي بەلگىلەرى انىقتالدى. ولاردىڭ 28 ءى اۋرۋحاناعا جاتقىزىلدى» ، - دەدى دياس احمەتشارىپ قازمەديا ورتالىعىندا وتكەن بريفينگتە.

قازىرگى ۋاقىتتا پويىزداردىڭ قوزعالىسى، اۋە قاتىناسى جانە قىتايمەن جەڭىل اۆتوكولىك تاسىمالى توقتاتىلدى. مەديتسينالىق ۇيىمدار تۇرعىلىقتى جەرى بويىنشا قىتايدان كەلگەن ازاماتتاردىڭ دەنساۋلىعىن باقىلاۋدى جالعاستىرىپ وتىر.

«5 - اقپانعا دەيىن جرۆي بەلگىلەرى بار 104 ادام اۋرۋحاناعا جاتقىزىلدى، 71 ادام اۋرۋحانادان شىعارىلدى. 33 پاتسيەنت ستاتسيوناردا قالدى. ناۋقاستاردىڭ جاعدايى جاقسى. كوروناۆيرۋس انىقتالعان جوق. بارلىق اۋرۋحانادان الىنعان سىنامالار قوسىمشا باقىلاۋ ءۇشىن الماتىداعى ۇلتتىق عىلىمي ەرەكشە جۇقپالى اۋرۋلار ورتالىعىنا جىبەرىلەدى. بۇل ورتالىق جاڭا كوروناۆيرۋستى پوليمەرازدى تىزبەكتى رەاكسيا ادىستەمەسىن مەڭگەرگەن» ، - دەدى د. احمەتشارىپ.

الەم بويىنشا، جاڭا كوروناۆيرۋس سالدارىنان قازا تاپقاندار سانى بۇگىن 490 عا جەتتى.