قىتاي 60 جىلدان بەرى بولماعان تابيعي اپاتتان زارداپ شەگۋدە

بەيجىڭ. قازاقپارات - قىتايدا بيلىك اپتاپ ىستىق سالدارىنان اۋا تەمپەراتۋراسى قاۋپىنىڭ ەڭ جوعارى قىزىل دەڭگەيىن تاعى دا ۇزارتتى.

ءبىر ايدان بەرى چاڭجياڭنىڭ ورتا جانە تومەنگى اعىسىنداعى اۋدانداردا كۇندىز اۋا تەمپەراتۋراسى پليۋس 40 گرادۋسقا دەيىن جەتۋدە، دەپ حابارلايدى قازاقپارات ءتىلشىسى.

سينوپتيكتەردىڭ بولجامىنشا، مۇنداي اۋا رايى تاعى ءبىر اپتاعا سوزىلادى. قىتايدا اپتاپ ىستىق ەكى ايدان استام ۋاقىتقا سوزىلدى. بۇل - 1961 -جىلى باقىلاۋ باستالعاننان بەرگى ەكسترەمالدى تەمپەراتۋرا ساقتالعان ەڭ ۇزاق كەزەڭ.

23-تامىزدا، التى پروۆينتسيا مەن چۋنتسين مەگاپوليسىندە تەرمومەتر باعامى 40 گرادۋستان جوعارى كوتەرىلۋى مۇمكىن دەپ كۇتىلۋدە. سينوپتيكتەر جەرگىلىكتى بيلىك ورگاندارىنا اپتاپ ىستىقپەن كۇرەس بويىنشا شۇعىل شارالار قابىلداۋدى، اشىق اۋادا جۇمىس ىستەۋدى توقتاتۋدى، ءورت قاۋىپسىزدىگىن قامتاماسىز ەتۋدى ءجىتى قاداعالاۋدى جانە حالىقتىڭ وسال توپتارىنا ەرەكشە نازار اۋدارۋدى ۇسىنادى.

قىتايدا اۋا رايىنىڭ قولايسىزدىعى تۋرالى ءتورت دەڭگەيلى ەسكەرتۋ جۇيەسى بار، وندا ءقاۋىپتىڭ ەڭ جوعارى دەڭگەيى قىزىل تۇسپەن، ودان كەيىن قىزعىلت سارى، سارى جانە كوك تۇستەرمەن كورسەتىلەدى. وتكەن بەيسەنبىدەن باستاپ قىتايدىڭ وڭتۇستىك- باتىسىنداعى چۋڭچيڭنىڭ اۋماعىندا جوعارى اۋا تەمپەراتۋراسى مەن قۇرعاقشىلىققا بايلانىستى بىرنەشە ورمان ءورتى تىركەلدى.

قۇتقارۋ جۇمىستارىنا جانە شۇعىل كومەك كورسەتۋ ءۇشىن قۇتقارۋ توپتارىنىڭ، قارۋلى پوليتسيانىڭ، ورمان ءورتىن سوندىرۋشىلەردىڭ جانە باسقا ۆەدومستۆولاردىڭ جالپى سانى 5000-نان استام قىزمەتكەرى، سونداي- اق جەتى تىكۇشاق جىبەرىلدى.

1500-دەن استام ادام ەۆاكۋاتسيالاندى.

اۆتور اياۋلىم التىنبەك