07:38, 23 - قاراشا 2018 | GMT +5
قۇلاۋعا شاق قالعان بيىكتىگى 60 مەترلىك مۇنارا قايتا تۇزۋلەنە باستادى
استانا. قازاقپارات - يتالياداعى پيزا ۋنيۆەرسيتەتىنىڭ ماماندارى اتاقتى پيزان مۇناراسىنىڭ جاعدايى جاقسارعاندىعىن ءمالىم ەتتى. ونى نىعايتۋ شارالارىنان سوڭ مۇنارا 4 سانتيمەترگە تۇزۋلەنگەن، دەپ حابارلايدى BBC.
پيزان مۇناراسىنىڭ قيسايۋىنا ول تۇرعىزىلعان جەردىڭ وڭ جاعىنداعى قۇم مەن بالشىق قاباتىنىڭ سول جاعىنداعىعا قاراعاندا جۇمساق بولۋى اسەر ەتكەن.
قۇرىلىسشىلار ءۇشىنشى قاباتقا جەتكەن ساتتە نىسان استىنداعى توپىراق وتىرا باستاعان.
قۇلاۋ قاۋپى تۋىنداعان 1990-جىلى پيزان مۇناراسى كەلۋشىلەر ءۇشىن جابىلدى. سول كەزدە ونىڭ ۇستىڭگى بولىگى ءبىر جاعىنا 4,5 مەترگە قيسايعان ەدى.
ايتا كەتسەك، اق مراموردان قالانعان 60 مەترلىك مۇنارانى ەكى عاسىرعا جۋىق - 1173-جىلدان باستاپ 1360-جىلعا دەيىن سالعان ەدى.