جاتتىعۋ جاساپ اقشا ال - 60 جاستاعى اقساقال جاستاردى باسكە شاقىردى - كەسكىن
جەكسەن ايۋپوۆتىڭ گيمناستيكالىق جاتتىعۋلار جاساپ جاتقان ۆيدەوسى تالايدى تاڭ قالدىردى. ول كەز كەلگەن اداممەن جارىسقا تۇسۋگە دايىن ەكەندىگىن ايتتى.
جەكسەن ايۋپوۆ 1958 -جىلى دۇنيەگە كەلگەن. بالا كەزىنەن سپورتتى جانىنا سەرىك ەتكەن ازامات، كۇرەس جانە جەڭىل اتلەتيكامەن اينالىسقان. ول ءوزى باعىندىرعان نورماتيۆتى قايتالاي الاتىن ادامدى ءالى كەزدەستىرمەگەنىن ايتادى.
«ءبىز تۇسىرگەن ۆيدەو جاستاردى مەنىمەن باسكە ءتۇسۋ ءۇشىن ازىرلەنگەن. مەن روليكپەن جاسالاتىن جاتتىعۋدى 100 رەت جاسايمىن، وسىنى قايتالاي الاتىن اقتاۋدا ادام بار ما ەكەن؟ بازاردا جۇمىس ىستەيمىن. كۇن سايىن مەن ىستەگەن جاتتىعۋلاردى قايتالاعان ادامعا ءباس تىگەم. ءباس قۇنى 5 مىڭ تەڭگە. 10 رەت جاساسا بولدى. اقشانى العىسى كەلەتىندەر كوپ ءبىراق وعان اركىمنىڭ شاماسى جەتە بەرمەيدى. كوبى ءبىر رەتتەن كەيىن قۇلاپ جاتادى»، - دەيدى ول.
سوڭعى 10 جىل كولەمىندە جەكسەن ايۋپوۆ تاڭعى التىدا تۇرىپ 3-4 شاقىرىم جۇگىرگەن سوڭ 30 رەت تۋرنيككە تارتىلادى ەكەن. ودان كەيىن ۇيىنە بارىپ مىندەتتى تۇردە سۋىق دۋش قابىلدايدى.
«اقتاۋلىقتاردى مەنىمەن بىرگە جاتتىعۋ جاساۋعا شاقىرامىن. كەز كەلگەن كولەمدەگى اقشانى باسكە تىگۋلەرىڭىزگە بولادى. مەنىڭشە 50 مىڭنان ارتىق ەشكىم تىگە المايتىن شىعار. وزىنە سەنگەندەر حابارلاسسىن، مەن تەك قۋانامىن»، - دەيدى جەكسەن ايۋپوۆ.
جامان ادەتتەردەن بويىن اۋلاق ۇستايتىن جەكسەن ايۋپوۆ ءومىر بويى جۇرگىزۋشى بولىپ جۇمىس ىستەگەن.
