فيزيكا سالاسىندا 60 قا جۋىق ەڭبەك جازعان قازاق عالىمى قاڭعىباستار ۇيىندە ءجۇر
فيزيكا عىلىمىندا وزىندىك قولتاڭباسىن قالدىرىپ، 60 قا جۋىق ەڭبەك جازعان ساپارباي ارىنوۆ الماتىداعى تۇراقتى مەكەنى جوقتارعا ارنالعان بەيىمدەۋ ورتالىعىندا جاتقانىنا 2 ايعا جۋىقتاعان. اقساقالدى بۇزاقىلار سوققىعا جىعىپ، بار اقشاسى مەن قۇجاتتارىن قولدى قىلىپتى. امالى تاۋسىلعان قاريا قاڭعىباستار ءۇيىن پانالاۋعا ءماجبۇر بولعان. ساپارباي قارتتى كەلىنى ۇيلەرىنە سىيعىزباعان كورىنەدى.
«ءوزىنىڭ اۋزىنان ەستىگەنىم، «مەن ءسىزدى جولاتپايمىن» دەگەندەي اڭگىمەنى ەستىگەنمىن. ول ەندى مىناۋ جاسى كەلگەن ادامعا ول جاقسى تيمەيدى»، - دەدى فيزيكا-ماتەماتيكا عىلىمدارىنىڭ كانديداتى، ساپارباي ارىنوۆ.
كەلىنىنە وكپەسى قارا قازانداي بولسا دا، قاريا بۇل سوزدەردى ۇلىنا جەتكىزبەپتى. تەك بولەك تۇرۋعا بەل بۋعانىن عانا ايتقان. وسىلايشا، ساپارباي ارىنوۆ قاڭعىباستار ۇيىنەن ءبىراق شىققان. 72 جاستاعى قاريا ءالى دە تىڭ. بۇعان دەيىن الماتى تەحنولوگيا ۋنيۆەرسيتەتىندە ساباق بەرىپ، 20 جىلدان استام يادرولىق فيزيكا ينستيتۋتىندا ەڭبەك ەتكەن عالىم قازىر كىتاپ جازىپ جاتىر ەكەن. «ەلەكتروتەحنيكا» اتتى كىتابىن فيزيكا عىلىمىن قازاق تىلىندە تەرەڭىنەن مەڭگەرەتىن ستۋدەنتتەرگە ارناماق.
«جاۋتىكوۆ اتىنداعى فيزيكا- ماتەماتيكا مەكتەبىندە جۇمىس ىستەگەم 5-6 جىل. سوندا بالالاردى وليمپياداعا دايىنداعانمىن. سولاردىڭ الدى كۇمىس مەدال الدى، جاقسى ناتيجەلەر بولدى. سولارمەن دە جۇمىس ىستەۋ جوسپارىم بار ودان كەيىن تاعى ءبىر جوسپارىم، الماتى تەحنولوگيالىق ۋنيۆەرسيتەتىندە جاس جىگىتتەر مەن قىزدار بار. سولاردى اسپيرانتۋراعا تارتپاقپىن»، - دەدى فيزيكا-ماتەماتيكا عىلىمدارىنىڭ كانديداتى ساپارباي ارىنوۆ.
فيزيك عالىمنىڭ ءبىر ۇل ءبىر قىزى، 4 نەمەرەسى بار. ءبىراق، بالالارى اكەسىنە مۇلدەم ىزدەۋ سالمايتىن كورىنەدى. سونىڭ كەسىرىنەن، ورتالىقتاعىلار قامكوڭىل قاريانى قارتتار ۇيىنە دە وتكىزە الماي وتىر ەكەن.
«بۇل كىسىنىڭ بالا شاعاسى بولعاننان كەيىن ءبىز قابىلداماۋىمىز كەرەك بۇل ورتالىققا. ەندى جاعدايعا بايلانىستى، قازىر قىس ءتۇستى كۇن سۋىتقاننان كەيىن قابىلدادىق. ءبىز باسقا قارتتار ۇيىنە وتكىزۋ ءۇشىن، بۇل كىسى قارتتار ۇيىنە بارعىم كەلەدى دەيدى. ءبىراق، ول ءۇشىن زاڭ بويىنشا بالا-شاعاسى باس تارتۋ كەرەك زاڭدى تۇردە، سوت ارقىلى»، - دەدى الماتى قالاسى بەيىمدەۋ ورتالىعى ديرەكتورىنىڭ مىندەتىن اتقارۋشى قازىبەك جىلقىبەكوۆ.
ايتا كەتەيىك، قاڭعىپ قالعاندار بەيىمدەۋ ورتالىعىندا تەك 1 جىلعا دەيىن پانالاي الادى.
