قاراعاندىدا بولات سىزدىقوۆتى ەسكە الۋ كونسەرتى مۋزىكانتتىڭ 60 جىلدىعى قۇرمەتىنە ءوتتى - فوتو، كەسكىن

قاراعاندى. قازاقپارات - قاراعاندىدا «دوستار الەم» كەشەنىنىڭ كونسەرت زالىندا بەلگىلى قازاقستاندىق مۋزىكانت بولات سىزدىقوۆتى ەسكە الۋ كەشى ءوتتى، دەپ حابارلادى «قازاقپارات» ح ا ا ءتىلشىسى.

كەنەتتەن كوز جۇمعان كومپوزيتور، ارلەۋشى، «ميۋزيكولا» توبىنىڭ گيتاراشىسى 60 جىلدىعىن تويلاي الماي كەتتى. مەرەيتوي 21 -ماۋسىمدا بولدى. وسى كۇنى ونىڭ تۋعان قالاسىندا ەسكە الۋ كونسەرتى ءوتتى. ب. سىزدىقوۆپەن بىرگە ءوز شىعارماشىلىعىن باستاعان قازاقستاندىق ەسترادا جۇلدىزدارى مەن قاراعاندىلىق ارتىستەر ارىپتەسىن، دوسىن ەسكە الدى.

«بولات ءاردايىم جۇرەگىمىزدە قالادى. ونىڭ اندەرى، مۋزىكاسى، بارلىق شىعارماشىلىعى ەلىنە، تۋعان قالاسىنا، ءوزىن قورشاعان ادامدارعا دەگەن ماحابباتتان تۇرادى»، - دەدى كەشتى ۇيىمداستىرۋعا باستاماشىلىق ەتكەندەردىڭ ءبىرى، بيزنەسمەن- مەسەنات ەرلان دوسماعامبەتوۆ.

ەرلان كوكەيەۆ پەن «ك-7» توبى ب. سىزدىقوۆتىڭ رەپەرتۋارىنان «اتامەكەن»، «ەستەلىك» تۋىندىلارىن ورىندادى. زالدا ونىڭ تۋىستارى بولدى. «بولات قازاقستان، قاراعاندى جايلى كۇي شىعارۋدى ارماندايتىن، ۇلگەرمەي كەتتى. بۇگىنگى كونسەرت مەن ءۇشىن ەرەكشە»، - دەپ ويىمەن ءبولىستى اپكەسى راۋزا سىزدىقوۆا.

بالقاشتان بولاتتىڭ تالىمگەرى الەكساندر پرونين كەلدى. ول مۋزىكالىق كومپوزيتسياسىن ارنادى.

«ميۋزيكولا» دۋەتىندەگى ارىپتەسى كارينا ابدۋللينا كەشتىڭ ارنايى قوناعى بولدى. ول دوسىنا ارناپ ونىڭ جاقسى كورەتىن اندەرىنىڭ ءبىرى - «دەۆوچكا ۆ پلاتيتسە بەلوم» ءانىن ورىندادى. «ساكسافون» ءانىن ومىردەن وزعان بولات پەن جاقىن دوسى باتىرحان شۇكەنوۆكە ارنادى.

كەش سىزدىقوۆتىڭ قاراعاندىعا ارنالعان انىمەن اياقتالدى.

ەسكە سالساق، مۋزىكانت «ميۋزيكولا» توبىنىڭ نەگىزىن قالاعان ب. سىزدىقوۆ 2016 -جىلى 7 -مامىردا الماتىدا كەنەتتەن كوز جۇمعان بولاتىن.

ول قاراعاندىدا تۋعان. ءال-فارابي اتىنداعى شىمكەنت مادەنيەت ينستيتۋتىن اياقتاعان. قاراعاندى فيلورمونياسىندا ەڭبەك جولىن باستاپ، ءار جىلدارى «گۇلدەر»، «اراي»، «ا- ستۋديو» انسامبلدەرىندە ونەر كورسەتكەن. 1992 -جىلى «ميۋزيكولا» دۋەتىن قۇردى.