قازاقستاندا جىل سايىن 600 مىڭ ادامنان جۇرەك اۋرۋلارى انىقتالادى

استانا. قازاقپارات - بۇگىن، 6-شىلدەدە دۇنيەجۇزىلىك كارديولوگيا كۇنى اتالىپ وتىلەدى. بۇل كۇن 2000 -جىلى دۇنيەجۇزىلىك جۇرەك فەدەراتسياسىنىڭ باستاماسىمەن بەلگىلەنگەن، دەپ حابارلايدى قازاقپارات دەنساۋلىق ساقتاۋ مينيسترلىگىنە سىلتەمە جاساپ.

كارديولوگ جۇرەك- قان تامىرلارى اۋرۋلارىن زەرتتەۋمەن، دياگنوستيكالاۋمەن جانە ەمدەۋمەن اينالىسادى.

جۇرەك پەن قان تامىرلارىنىڭ اۋىر اۋرۋلارىنىڭ %90 ىندا ۇنەمى مەديتسينالىق تەكسەرۋدەن ءوتىپ، پروفيلاكتيكا شارالارىمەن اينالىسىپ، الدىن الۋعا بولادى.

قاتتى تەرلەۋ، دەنە سالماعىنىڭ تەز ءوسۋى، كەۋدە ايماعىنداعى اۋىرسىنۋ، جۇرەك ىرعاعىنىڭ بۇزىلۋى، باس اينالۋ، ارىقتاۋ، جۇرەكتىڭ قاتتى سوعۋ بەلگىلەرى كەزىندە كونسۋلتاتسيا الۋ ءۇشىن كارديولوگكە جۇگىنۋ كەرەك.

كارديولوگتەر جۇرەك-قان تامىرلارى اۋرۋلارىنىڭ بىرنەشە قاۋىپ فاكتورلارىن اتايدى. ولاردىڭ نەگىزگىلەرىنە مىنالار جاتادى: از قيمىلداۋ، تەمەكى شەگۋ، سەمىزدىك، ەموتسيونالدىق كۇيزەلىس، شامادان تىس تۇز، الكوگول پايدالانۋ، دۇرىس تاماقتانباۋ. وسى سەبەپتەردىڭ بارلىعى جۇرەك پەن قان تامىرلارىنا سالماق تۇسىرۋگە اكەلەدى.

جىل سايىن قازاقستاندا 600 مىڭ پاتسيەنتتە قان اينالىمى جۇيەسىنىڭ اۋرۋلارى (ق ج ا) دياگنوزى قويىلادى جانە ق ج ا-دان 40 مىڭ ادام قايتىس بولادى.

ەلىمىزدە بارلىعى 57 مەديتسينالىق ۇيىمدا كارديولوگيالىق، كارديوحيرۋرگيالىق جانە ينتەرۆەنسيالىق كارديولوگيالىق كومەك كورسەتىلەدى، وندا 848 كارديوحيرۋرگيالىق توسەك جانە 3800 كارديولوگيالىق توسەك ورنالاستىرىلعان.

قان اينالىم جۇيەسى اۋرۋلارىنىڭ سكرينينگى بويىنشا 2023 -جىلدىڭ 1-توقسانىندا 30859 پاتسيەنت قارالدى، 1132 پاتسيەنتتە ق ج ا انىقتالدى، 987 پاتسيەنت ديسپانسەرلىك ەسەپكە الىندى.

2023 -جىلدىڭ 1-توقسانىندا ق ج ا بار 92 مىڭنان استام پاتسيەنت، 2022 -جىلى بارلىعى 335 مىڭ پاتسيەنت ەمدەلدى.

قازاقستاندا قان اينالىم جۇيەسىنىڭ اۋرۋلارى، ينسۋلت، سونداي-اق جاراقاتتار، اتەروسكلەروز جانە جۇرەكتىڭ ليپيدتەر الماسۋىنىڭ بۇزىلۋى كەزىندە مەديتسينالىق كومەك كورسەتۋدى جەتىلدىرۋ بويىنشا ءتۇرلى جول كارتالارى جۇمىس ىستەيدى.