اۋىل اقساقالى باتا بەرىپ، 600 مىڭ تەڭگە ۇتىپ الدى

تاراز. قازاقپارات - جۋالىلىق قاريا امانجول ءدۇرالى ۇلى الماتى وبلىسىندا وتكەن «بابالار ءسوزى - دانانىڭ كوزى» اتتى رەسپۋبليكالىق باتاگوي قاريالار بايقاۋىندا جەڭىمپاز اتانعان، - دەپ حابارلايدى قازاقپارات ءتىلشىسى.

باتا جارىسى بالپىق ءبيدىڭ 325 جىلدىعىنا وراي «بابالار ەرلىگى - تاۋەلسىزدىك تىرەگى» اتتى شارا اياسىندا ۇيىمداستىرىلعان.

اتالعان بايقاۋعا وبلىستىق كەزەڭنىڭ جەڭىمپازى، جۋالىلىق امانجول ءدۇرالى ۇلى اقساقال قاتىسىپ، جەمىستى ونەر كورسەتكەن.

ول «قازاقتىڭ قاناتتى سوزدەرى» بولىمىندە باتىر باۋىرجان مومىش ۇلىنىڭ پاتريوتتىق سوزدەرىن جاتقا ايتۋىمەن ەرەكشەلەنىپ، «باتا بەرۋ» كەزەڭىندە دە 6 مينۋت مۇدىرمەستەن كوپشىلىكتىڭ ريزاشىلىعىنا بولەنگەن. سۇراق-جاۋاپ بولىمىنەن دە سۇرىنبەي وتكەن.

بايقاۋدىڭ قازىلار القاسىنىڭ ءتوراعاسى، بەلگىلى تەلەجۋرناليست نۇرتىلەۋ يمانعالي ۇلى جەرلەسىمىزدىڭ بارلىق كەزەڭگە تىڭعىلىقتى دايىندىقپەن كەلگەنىنە ريزاشىلىعىن ءبىلدىرىپتى. وسىلايشا امانجول ءدۇرالى ۇلى رەسپۋبليكالىق باتاگويلەر بايقاۋىنىڭ باس جۇلدەسىن ەنشىلەپ، 600 مىڭ تەڭگە اقشالاي سىيلىققا يە بولىپتى.

ايتا كەتەيىك، امانجول ءدۇرالى ۇلى اقساقال بۇگىندە وڭىردەگى قوعامدىق ىستەرگە بەلسەندىلىكپەن ارالاسىپ كەلەدى. ەل زيالىسى رەتىندە دە اتقارىپ جۇرگەن ىستەرى از ەمەس. اۋدانعا، وبلىسقا سىيلى قاريا جاس ۇرپاق تاربيەلەۋ جولىندا ۇلگى-ونەگە كورسەتىپ كەلەدى.