قازاقستان- فينليانديا بيزنەسمەندەرى 600 ميلليون دوللاردىڭ كەلىسىمشارتىن جاساستى
بۇل تۋرالى بۇگىن فينليانديا پرەزيدەنتىمەن شاعىن جانە كەڭەيتىلگەن قۇرامداعى كەزدەسۋلەردەن كەيىنگى بىرلەسكەن مالىمدەمە بارىسىندا ق ر پرەزيدەنتى نۇرسۇلتان نازاربايەۆ ايتتى، دەپ حابارلايدى قازاقپاراتتىڭ ارناۋلى ءتىلشىسى حەلسينكيدەن.
«ەڭ الدىمەن فينليانديا رەسپۋبليكاسىنىڭ پرەزيدەنتى ساۋلي نينيستەگە شاقىرۋى جانە دەلەگاتسيامىزدى دوستىق قابىلداۋى ءۇشىن ريزاشىلىعىمدى بىلدىرەمىن. بۇل تاۋەلسىزدىك جىلدارىمىزداعى فينلياندياعا ەكىنشى ساپارىم جانە وسى جىلدارى ىشىندەگى فين پرەزيدەنتتەرىمەن ءتورتىنشى كەزدەسۋىم. وسى جىلداردىڭ ىشىندە جوعارى دەڭگەيدەگى كەزدەسۋلەر بىزدەردى جاقىنداتا ءتۇستى. ءبىزدىڭ ارامىزدا ۇلكەن تۇسىنىستىك، سەنىم بار. بۇگىن دە سەنىمگە نەگىزدەلگەن احۋالدا كەلىسسوزدەر جۇرگىزىپ، ەڭ الدىمەن حالىقارالىق ساياسات، ءوڭىر، ەرتەڭ «ەۋروپا مەن ازيا فورۋمى» وتەتىن ەۋروپاداعى احۋال توڭىرەگىندەگى ماسەلەلەرى قاراستىردىق جانە ءبىزدىڭ بۇل تاقىرىپتارعا كوزقاراستارىمىز ورتاق» ، - دەدى نۇرسۇلتان نازاربايەۆ.
ەلباسى قازاقستان مەن فينليانديا اراسىندا ساياسي دا، ەكونوميكالىق تا پروبلەمالاردىڭ جوق ەكەندىگىن، بيزنەسكە دە بارلىق مۇمكىنشىلىك جاسالعانىن باسا ايتتى.
«مەن ەلدەرىمىزدىڭ اراسىنداعى ەكونوميكالىق بايلانىستارعا جاڭا سەرپىن بەرۋ ماقساتىندا كەلىپ وتىرمىن. كەشە فينليانديانىڭ ءىرى بيزنەس كاپيتاندارىمەن كەزدەسىپ، ولاردىڭ بىزدە جۇمىس ىستەۋگە دەگەن قىزىعۋشىلىعىن بايقادىم. ءبىزدىڭ بيزنەس كوشباسشىلارىمىزدىڭ كەزدەسۋى ناتيجەسىندە جالپى قۇنى 600 ميلليون دوللاردان اسىپ جىعىلاتىن وننان استام كەلىسىمشارتقا قول قويىلدى. وسى جولعا بۇل جامان كورسەتكىش ەمەس» ، - دەدى مەملەكەت باسشىسى.
نۇرسۇلتان نازاربايەۆ قازاقستان مەن فينليانديا تاۋ- كەن ءوندىرۋ، حيميا، اۋىل شارۋاشىلىعى، ماشينا جاساۋ جانە جاڭا تەحنولوگيالار سالاسىنداعى ىنتىماقتاستىقتى ورىستەتىپ وتىرعانىن اتاپ ءوتتى.
ەستەرىڭىزگە سالا كەتسەك، بۇگىن ەلباسى فينليانديا پرەزيدەنتى ساۋلي نينيستەمەن شاعىن جانە كەڭەيتىلگەن قۇرامدا كەزدەسۋ وتكىزدى. ساپار اياسىندا مەملەكەت باسشىسى كەشە فين بيزنەس كاپيتاندارىمەن كەزدەستى. كەزدەسۋ بارىسىندا مەملەكەت باسشىسى فينليانديادان قازاقستان ارقىلى قىتايعا جاڭا تەمىر جول باعدارى اشىلاتىندىعىن ايتتى جانە فين كومپانيالارىن ەلىمىزدىڭ اگروونەركاسىپتىك كەشەندەگى جوبالاردى جۇزەگە اسىرۋعا شاقىردى. فين كومپانيالارى ءۇشىن قازاقستاننىڭ تۋريزم سالاسى دا تارتىمدى ەكەنىن، IT- كومپانيالارىنا دا قولايلى جاعداي جاسالاتىندىعىن اتاپ ءوتتى.
