قازاقستاندىقتارعا 600 جەكەمەنشىك كلينيكا تەگىن قىزمەت كورسەتەدى
بۇل الەۋمەتتىك مەديتسينالىق ساقتاندىرۋ قورى بارلىق جەتكىزۋشىلەرىنىڭ جارتىسىنا جۋىعىن قۇرايدى، دەپ حابارلايدى قازاقپارات.
«الەۋمەتتىك مەديتسينالىق ساقتاندىرۋ قورى 2018 -جىلى تەگىن مەديتسينالىق كومەكتىڭ كەپىلدەندىرىلگەن كولەمى اياسىندا حالىققا قىزمەت كورسەتەتىن مەديتسينالىق ۇيىمدارمەن كەلىسىمشارت جاساسۋ پروتسەدۋراسىن اياقتايدى. كەلىسىمشارت ءبىرىنشى كەزەكتە ءبىرىنشى مەديتسينالىق- سانيتارلىق، جەدەل مەديتسينالىق جانە وزگە دە باسىمدىقتى باعىتتار بويىنشا كومەك كورسەتۋ ءۇشىن جاسالدى» ، - دەلىنگەن اتالعان قور تاراتقان اقپاراتتا.
2018 -جىلدىڭ قاڭتارىنداعى مالىمەتتەرگە سايكەس، 2018 -جىلعا ارنالعان مەديتسينالىق قىزمەتتەردى ساتىپ الۋ كولەمىن ءبولۋ جونىندەگى وڭىرلىك جانە رەسپۋبليكالىق كوميسسيالار مەديتسينالىق كومەكتىڭ جوسپارلانعان كولەمىنە ءوتىنىم بەرگەن 1385 مەديتسينالىق ۇيىممەن كەلىسىمشارت جاساسۋ تۋرالى شەشىم قابىلداعان.
5 - قاڭتارداعى مالىمەتتەر بويىنشا مەديتسينالىق كومەكتىڭ كەپىلدەندىرىلگەن كولەمىنە جاسالعان كەلىسىمشارتتاردىڭ جالپى سوماسى 673 ميلليارد تەڭگەنى نەمەسە اعىمداعى جىلى رەسپۋبليكالىق بيۋدجەتتەن مەديتسينالىق كومەك كورسەتۋگە بولىنگەن بارلىق قاراجاتتىڭ شامامەن 80 پايىزىن قۇرادى. قالعان قاراجات ەل ۇكىمەتى مەن دەنساۋلىق ساقتاۋ مينيسترلىگى قور الدىنا قويعان مىندەتتەر مەن ماقساتتاردى ەسكەرە وتىرىپ، جىلدىڭ ىشىندە ورنالاستىرىلاتىن بولادى.
«2018 -جىلى مەملەكەتتىك تاپسىرىس اياسىندا حالىققا شامامەن 600 جەكەمەنشىك مەديتسينالىق ۇيىم قىزمەت كورسەتەتىن بولادى. بۇل قوردىڭ بارلىق جەتكىزۋشىلەرىنىڭ 43 پايىزىن قۇرايدى. 2017 - جىلمەن سالىستىرعاندا جەكەمەنشىك جەتكىزۋشىلەردىڭ سانى 130 مەديتسينالىق ۇيىمعا ارتتى. اعىمداعى جىلى جەكەمەنشىك مەديتسينالىق ۇيىمدارمەن جاسالعان كەلىسىمشارت سوماسى 95 ميلليارد تەڭگەنى قۇرايدى. بۇل 2017 -جىلدىڭ ءدال وسىنداي كورسەتكىشىنەن 2 ەسەگە ارتىق» ، - دەلىنگەن قور اقپاراتىندا.
ايتا كەتەرلىگى، اعىمداعى جىلى مەملەكەتتىك تاپسىرىس اياسىندا ەلوردا تۇرعىندارىنا 81 مەديتسينالىق ۇيىم قىزمەت كورسەتەدى. ونىڭ 36 سى مەملەكەتتىك جانە 45 سى جەكەمەنشىك اۋرۋحانالار مەن كلينيكالار. ولارمەن جالپى سوماسى 75,5 ميلليارد تەڭگە بولاتىن كەلىسىمشارت جاسالدى. ال الماتىدا 171 مەديتسينالىق ۇيىم، ونىڭ ىشىندە 71 جەكەمەنشىك مەكەمە حالىققا قىزمەت كورسەتەدى. اتالعان ۇيىمدارمەن بيىل 80 ميلليارد تەڭگەدەن استام سوماعا كەلىسىمشارت جاسالعان.
