استانا الەمنىڭ 600 قالاسىمەن باسەكەگە تۇسەدى - قايرات كەلىمبەتوۆ
«الداعى 30 جىلدا ەكونوميكاسى دامىعان مەملەكەتتەردىڭ عانا ەمەس، قالالاردىڭ اراسىندا باسەكە بايگەسى قىزا تۇسەدى. بۇگىنگى تاڭدا الەمنىڭ 600 قالاسى دەگەنىمىز - جەر جاھاننىڭ ىشكى جالپى ءونىمىنىڭ 80 پروتسەنتى ەكەنىن ەسكەرۋ كەرەك. سول سەبەپتى، حالىقارالىق باسەكەدە قازاقستاننىڭ قاي قالاسى وزىق ەكەنىن كورسەتە ءبىلۋدىڭ ماڭىزى زور. استانا - باسەكەلەستىك ءۇشىن №1 قالا بولا الادى. باسەكەگە قابىلەتتى بولۋ ءۇشىن استانا «اقىلدى قالالاردىڭ» جاھاندىق جەلىسىنىڭ ءبىر بولشەگىنە اينالدى»، - دەيدى قايرات كەلىمبەتوۆ ۇكىمەت ۇيىندە وتكەن باسپا ءسوز ءماسليحاتىندا.
ونىڭ ايتۋىنشا، حالىقارالىق قارجى ورتالىعى استانانى ىقپالدى قالالاردىڭ قاتارىنا قوسۋدا كۇش سالاتىن بولادى. قايرات كەلىمبەتوۆ ءوز سوزىندە ەكسپو اۋماعىندا «اقىلدى قالانىڭ» ساراپتاما ورتالىقتارىن قۇرۋ ءۇشىن اكىمدىكپەن مەموراندۋمعا قول قويىلعانىن جەتكىزدى.
«قارجى ورتالىعى قۇرىلۋى ءۇشىن استانا «اقىلدى قالالاردىڭ» بىرىنە اينالۋى كەرەك دەپ ايتۋعا بولادى. بۇل تۇرعىدا قالانىڭ ينفراقۇرىلىمىنا عانا ەمەس، استانانىڭ حالىقارالىق جەتەكشى قارجى ورتالىقتارىمەن بايلانىسىنا دا باسا ماڭىز بەرىلەدى. الداعى ەكى جىلدا نيۋ- يورك، توكيو، سينگاپۋر، شاڭحاي سياقتى ىرگەلى شاھارلارعا تىكە ۇشاتىن رەيستەر اشىلادى دەپ ۇمىتتەمىن»، - دەيدى ول.
سونىمەن قاتار، قايرات كەلىمبەتوۆ قارجى ورتالىعىنىڭ تەك قانا استانانىڭ دامۋى ءۇشىن جۇمىس اتقاراتىنى تۋرالى اڭگىمەنى جوققا شىعاردى.
«ح ق و - قازاقستاننىڭ بارلىق وڭىرلەرىنە ينۆەستيتسيا تارتۋ باعىتىندا جۇمىس اتقاراتىنىن اتاپ وتكىم كەلەدى. سونىمەن بىرگە، ەڭ ماڭىزدى جايتتاردىڭ ءبىرى - استانانىڭ ينفراقۇرىلىمنىڭ قۇرىلىسىن قولداۋ سالاسىندا ينۆەستيتسيا تارتۋدىڭ حابىنا اينالادى. ءبىز قورعاستان باستالىپ، استانادان وتەتىن، ارى قاراي ءار ءتۇرلى باعىتتا رەسەيگە جول تارتاتىن جىبەك جولىن - وسىناۋ بارلىق ينفراقۇرىلىمدىق ينۆەستيتسيالاردى ح ق و ارقىلى قولدايمىز دەپ ەسەپتەيمىز»، - دەدى ول.
اۆتور: ايان بەكەن ۇلى
