مەدەۋ باسپالداقتارى بويىنشا جۇگىرۋگە 600 دەن استام ادام قاتىستى

 الماتى. قازاقپارات - الماتىدا «سپورتتىق الماتى» اۋقىمدى قالالىق باعدارلاماسىنىڭ اياسىندا 28- جىل سايىنعى مەدەۋ ساتىسى بويىنشا جۇگىرۋ شاراسى ءوتتى.

«ءداستۇرلى جىل سايىنعى مەدەۋ ساتىسى بويىنشا جۇگىرۋ شاراسى بيىل 28- رەت وتۋدە. وسى جولى جارىس جالپى قالالىق «سپورتتىق الماتى» باعدارلاماسى اياسىندا ۇيىمداستىرىلىپ وتىر. بىزدە جۇگىرۋگە 20 جىلدان استام ۋاقىت قاتىسىپ جۇرگەندەر دە بار. الماتىلىقتار ءۇشىن بۇل ءار كۇزدە بارلىق وتباسىنىڭ تاعاتسىزدانا كۇتەتىن يگى داستۇرىنە اينالدى. وسى جولى 600 دەن استام الماتىلىق مەن قالا قوناقتارى قاتىسۋشى رەتىندە تىركەلدى»، - دەدى جارىس ۇيىمداستىرۋشىلارىنىڭ ءبىرى ايدوس باقاشيەۆ.

ەڭ كىشى سپورتشىلار 100 باسقىشقا جۇگىردى. 70 جاستى القىمداعاندار دا وسى قاشىقتىقتا شىقتى. ولاردىڭ ءبىرى جەتپىس بەس جاستاعى مارافونشى سابىربەك شىلىكبايەۆ. ول جۇگىرۋگە 20- رەت قاتىسىپ وتىر. ايتۋىنشا، قارت جىلدا جۇلدەلى ورىنعا يە بولادى ەكەن. وسى جولى دا سپورتشى ەكىنشى بولىپ جەتتى.

بارلىعى التى قاشىقتىقتا جارىسۋ كوزدەلگەن. بۇل 100، 200، 300، 400، 500 جانە 841 باسقىش.

 جەڭىمپازدار باعالى سىيلىقتارمەن، ديپلومدارمەن ماراپاتتالدى. بۇدان باسقا، ءتۇرلى نوميناتسيا بويىنشا بەلسەندى قاتىسۋشىلار ەستەلىك سىيلىقتار الدى.

 جارىستى ۇيىمداستىرعان الماتى قالاسى دەنە تاربيەسى جانە سپورت باسقارماسى، مەدەۋ اۋدانىنىڭ اكىمدىگى، «OMRON» مەديتسينالىق كومپانياسى. شارا مەگاپوليستە بۇقارالىق سپورتتى دامىتۋعا باعىتتالعان.