قىتاي الماتى وبلىسىنا 600 ميلليون دوللار كولەمىندە ينۆەستيتسيا سالۋعا ءازىر

استانا. قازاقپارات - قىتاي كاسىپكەرلەرى الماتى وبلىسىندا زىعىر مايىن شىعاراتىن زاۋىت سالۋعا نيەت ءبىلدىرىپ وتىر، دەپ حابارلادى وبلىس اكىمدىگىنىڭ باسپا ءسوز قىزمەتىنەن.

وبلىس اكىمى اماندىق باتالوۆ قىتاي ەلىنەن كەلگەن ينۆەستورلارمەن كەزدەستى. باس قوسۋعا قىتايداعى كەدەي اۋداندار مادەني قاۋىمداستىعىنىڭ ءتوراعاسى لي چيفەنگ، باس حاتشىسى ۆان فانپين، Jiaxin International Resources Investment Limited (Hong Kong)  كەڭەسىنىڭ ءتوراعاسى ليۋ ليچيان، اۋىل شارۋاشىلىعى بويىنشا ساراپشى دان جانحاي، جاڭ جيەنپيڭ، «Kaz Grain Food Almaty» ج ش س وكىلدەرى قاتىستى.

ينۆەستورلاردى وبلىسقا ەرتىپ اكەلىپ، ۇتىمدى ۇسىنىستارىن جەتكىزىپ جۇرگەن جەرگىلىكتى كاسىپكەر «Kaz Grain Food Almaty» ج ش س ديرەكتورلار كەڭەسىنىڭ ءتوراعاسى باۋىرجان بايمۇحانوۆ. ەلىمىزدىڭ ءبىرقاتار وڭىرلەرىن ارالاپ شىققان قىتايلىق دەلەگاتسيا جەتىسۋ جەرىنىڭ تابيعي كليماتىنىڭ قولايلىلىعىن ەسكەرىپ، وسى وڭىرگە زىعىر مايىن شىعاراتىن زاۋىت سالۋدى جوسپارلاعان.

- مۇنداي ۇسىنىستاردى ءبىز قولدايمىز. جاڭا تەحنولوگيالى زاۋىت اشىلسا، ول سول ءوڭىردىڭ ەكونوميكاسىن كوتەرۋگە، جاڭا جۇمىس ورىندارىن اشۋعا مۇمكىندىك جاسايدى. سوندىقتان ءبىز دە قولداپ، بىرلەسە جۇمىس اتقارۋعا كەلىسىم بەردىك، - دەدى وبلىس باسشىسى ا. باتالوۆ.

قىتاي كەدەي اۋداندار مادەني قاۋىمداستىعىنىڭ ءتوراعاسى لي چيفەن قوردىڭ اۋىلدىق جەرلەردى يندۋستريالاندىرۋ، اۋىل شارۋاشىلىعىن دامىتۋ ماقساتىندا قىزمەت ەتەتىنىن جەتكىزدى. ولار وڭىرگە جوعارىدا اتالعان سالالاردى دامىتۋ باعىتىندا 600 ميلليون ا ق ش دوللارى كولەمىندە ينۆەستيتسيا سالۋعا ءازىر ەكەنىن ايتىپ، ۇسىنىستارىنا قولداۋ كورسەتكەنى ءۇشىن وبلىس باسشىسىنا العىسىن ءبىلدىردى.

- بۇگىندە بىزدە جەرگىلىكتى حالىقتى تاماقپەن قامتۋ، ونىڭ ىشىندە ەكولوگيالىق تالاپقا ساي ونىممەن قامتۋ ماسەلەسى باستى نازاردا تۇر. سوندىقتان ءوزارا ىنتىماقتاسا ەڭبەك ەتسەك، ەكى تاراپقا ءتيىمدى بولاتىن ەدى، - دەدى قىتايلىق وكىل.

جيىن سوڭىندا ەكى ەل وكىلدەرى ىنتىماقتاستىق تۋرالى مەموراندۋمعا قول قويىپ، بىرلەسە جۇمىس اتقارۋعا كەلىستى.