5G تەحنولوگياسىمەن قامتۋ دەڭگەيى قانداي
استانا. KAZINFORM - بۇگىن ءماجىلىستىڭ جالپى وتىرىسىندا 2024 -جىلعى رەسپۋبليكالىق بيۋدجەتتىڭ اتقارىلۋى تۋرالى ۇكىمەت ەسەبىن تالقىلاۋ كەزىندە ق ر قارجى ءمينيسترى ءمادي تاكيەۆ ۇلتتىق جوبالاردى ىسكە اسىرۋ قورىتىندىسىن جاريالادى.
- «جايلى مەكتەپ»، «اۋىلدا دەنساۋلىق ساقتاۋدى جاڭعىرتۋ» جانە «قولجەتىمدى ينتەرنەت» ءۇش ۇلتتىق جوبانى ىسكە اسىرۋعا 751 ميلليارد تەڭگە ءبولىندى. «جايلى مەكتەپ» ۇلتتىق جوباسىن ىسكە اسىرۋعا وڭىرلەرگە 647 ميلليارد تەڭگە اۋدارىلدى. 254 مىڭ وقۋشى ورنى اشىلدى، 105 مەكتەپتىڭ قۇرىلىسى اياقتالدى. 2025 -جىلى تاعى 112 مەكتەپتى پايدالانۋعا بەرۋ جوسپارلانعان، - دەدى م. تاكيەۆ.
ونىڭ ايتۋىنشا، «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسىن ىسكە اسىرۋعا 91,3 ميلليارد تەڭگە ءبولىندى. 460 نىساننىڭ قۇرىلىسى اياقتالدى. 2025 -جىلدىڭ سوڭىنا دەيىن 195 دەنساۋلىق ساقتاۋ وبەكتىسىنىڭ قۇرىلىسى اياقتالىپ، 32 كوپسالالى ورتالىق اۋداندىق اۋرۋحانا جاڭعىرتىلاتىن بولادى. مەديتسينا كادرلارىنىڭ تاپشىلىعىن تومەندەتۋ بويىنشا وڭ سەرپىن بايقالادى. 2023 -جىلمەن سالىستىرعاندا دارىگەرلەر تاپشىلىعى 17 پايىزعا تومەندەدى.
- «قولجەتىمدى ينتەرنەت» ۇلتتىق جوباسىن ىسكە اسىرۋعا 13 ميلليارد تەڭگە ءبولىندى. 5G مەن رەسپۋبليكالىق ماڭىزى بار قالالار 30 پايىزعا، وبلىستىق ماڭىزى بار قالالار 15 پايىزعا قامتىلدى، - دەدى مينيستر.
ايتا كەتەيىك، 2027 -جىلدىڭ سوڭىنا دەيىن بايلانىس وپەراتورلارى 5G تەحنولوگياسىن دامىتۋعا 450 ميلليارد تەڭگە ينۆەستيتسيا سالادى.
بىرنەشە جىل بۇرىن ەلىمىزدە 5G جاڭا ۇيالى بايلانىس جەلىسىن ەنگىزۋ باستالدى. جوبا اياسىندا 2027 -جىلعا قاراي رەسپۋبليكالىق ماڭىزى بار قالالاردىڭ 75 پايىزىندا، وبلىس ورتالىقتارىنىڭ 60 پايىزىندا 5G تەحنولوگياسى قوسىلادى.
