اقتاۋدا تۋىستارى كىرگىزبەي قويعان ايەل 5 اي جاعالاۋدا شاتىر تىگىپ تۇرعان

استانا. قازاقپارات - اقتاۋدا باسپاناسىز جانە جۇمىسسىز قالعان جاس ايەل ءساۋىر ايىنان كۇنى بۇگىنگە دەيىن تەڭىز جاعاسىندا شاتىردا تۇرۋعا ءماجبۇر بولعان.

رەسەيدەن قايتىپ كەلگەن ونى تۋىستارى قابىلداماعان. ونىڭ قيىن جاعدايىن بىلگەن قالا تۇرعىندارى جۇمىس پەن باسپانا ماسەلەسىن ءبىر كۇندە شەشىپ بەردى، دەپ حابارلايدى قازاقپارات Lada.kz-كە سىلتەمە جاساپ.

اقتاۋلىق ەرىكتىلەردىڭ ءبىرى اناتوليدىڭ جازۋىنشا، ناتاليا - قازاقستان ازاماتى. ول كەز كەلگەن كومەكتەن باس تارتىپ، وعان تەك جۇمىس تابۋعا كومەك سۇراعان. ونىڭ بارلىق قاجەتتى قۇجاتتارى جانە ەكى جوعارى ءبىلىمى بار.

ەرىكتىلەر وعان ازىق-تۇلىك ساتىپ الىپ باردى.

«ايەلدەر وعان كەلىپ سويلەستى. قالادا تۋىستارى بار، ءبىراق ولار ارالاسپايدى ەكەن. ءدال قازىر ونى الىپ كەتىپ، جۇمىسقا ورنالاستىرىپ، باسپانا بەرەمىز»، - دەپ جازدى چاتتا بەلسەندىلەردىڭ ءبىرى.

بىرنەشە قاتىسۋشى ونى ۋاقىتشا تىركەۋگە تۇرعىزۋدى ۇسىندى. تاعى ءبىرى وعان جاعدايى جاقسارعانشا پاتەرىن ۇسىناتىنىن جازعان.

بىرنەشە ساعاتتان كەيىن ايەلدى ەرىكتىلەردىڭ ءبىرى ۇيىنە الىپ كەتكەنى بەلگىلى بولدى. ول ناتالياعا جۇمىس ىزدەپ ءجۇر.

اناتوليدىڭ ايتۋىنشا، ناتاليا - جەرگىلىكتى تۇرعىن. ول ماسكەۋگە جۇمىس ىستەۋگە، وقۋعا كەتكەن. كوروناۆيرۋس پاندەمياسى باستالعانعا دەيىن ءارتۇرلى جەرلەردە جۇمىس ىستەگەن.

جىلدىڭ باسىندا ول تۋعان جەرى اقتاۋعا ورالدى. بەلسەندىلەر چاتىندا جازىلعانداي، ونىڭ تۋىستارى: «سەن مىقتىسىڭ، ءبىز ساعان سەنەمىز» دەپ، ۇيگە كىرگىزبەي قويعان.

«قاڭتاردان ساۋىرگە دەيىن ول ءار جەردە جۇمىس ىستەگەن. سودان كەيىن پانالاۋ ءۇشىن شاتىر ساتىپ العان. كۇنىنە ءۇش مىڭعا دارەتحانا تازالاۋشى بولىپ جۇمىس ىستەدى. جالاقىنى كوتەرۋدى سۇراعان ول جۇمىستان بوساتىلعان»، - دەدى اناتولي.