قانت ديابەتىمەن اۋىراتىن ايەلدە شالا تۋۋ ىقتيمالدىعى 5 ەسە جوعارى

الماتى. قازاقپارات - ديابەت - قان قۇرامىندا قانت مولشەرىنىڭ كوبەيىپ كەتۋىنەن پايدا بولاتىن دەرت. بۇل اۋرۋمەن جاس تا، كارى دە اۋىرادى.

اسىرەسە، جۇكتى كەزدەگى ديابەت قيىن، سوندىقتان اۋىرعاندارعا ارناۋلى ەمشارا قولدانۋ ۇسىنىلادى. بۇل تۋرالى كارديولوگيا جانە ىشكى اۋرۋلار ع ز ي №1-تەراپيا بولىمشەسىنىڭ ەندوكرينولوگى بالنۇر سۇلتانوۆا ايتتى، دەپ حابارلايدى قازاقپارات ءتىلشىسى.

دارىگەردىڭ سوزىنشە، قانت ديابەتىمەن اۋىراتىن جۇكتى ايەلدەر، ومىرگە ساۋ بالا اكەلە الادى. ءبىراق، ىقتيمال اسقىنۋلار ءبار.

«ەگەر 1 نەمەسە 2 ءتيپتى قانت ديابەتى دياگنوزى قويىلسا، قاۋىپ جوعارى بولۋى مۇمكىن، ياعني سالماعى ۇلكەن نارەستە قيىن بوسانۋدىڭ قاۋپىن ارتتىرادى. ءتىپتى، تۇسىك ءتۇسۋى مۇمكىن. ەگەر دە قانت ديابەتى اۋرۋىن ەمدەمەسە، بۇل جۇكتى ايەلدىڭ دە، ىشتەگى بالانىڭ دا دەنساۋلىعىنا ايتارلىقتاي زيانىن تيگىزەدى. ماسەلەن، بالا دۇنيەگە كەلگەننەن كەيىن جۇرەك جانە تىنىس الۋ پروبلەمالارى، سەمىزدىك نەمەسە قانت ديابەتىنىڭ دامۋى، تۋا بىتكەن جۇرەك پەن جۇيكە جۇيەسىنىڭ اۋىتقۋلارى بولۋى، ءتىپتى ءولى تۋۋى مۇمكىن. قانت ديابەتىمەن اۋىراتىن جۇكتى ايەلدەردە شالا تۋۋ ىقتيمالدىعى 5 ەسە جوعارى»، - دەيدى دارىگەر.

سونىمەن قاتار، ول جۇكتىلىككە دەيىن جانە جۇكتىلىك كەزىندە قانت ديابەتىن دۇرىس باسقارۋ بۇل قاۋىپتەردى ازايتۋعا كومەكتەسەتىنىن اتاپ ءوتتى.

«جۇكتىلىكتى جوسپارلاۋ كەرەك. جۇكتىلىك الدىندا، جۇكتىلىكتى جوسپارلاۋ جونىندە ەندوكرينولوگتەن كەڭەس الۋ قاجەت. 3 ايدا 1 رەت گليكيرلەنگەن گەموبلوبينگە تەست تاپسىرۋ قاجەت. ەگەر %6,5 دان دەڭگەيدى تومەن تۇسىرە الماساڭىز، سىزگە جانە ءسىزدىڭ بالاڭىزعا اسقىنۋ قاۋپىن ازايتۋ ءۇشىن ونى مۇمكىندىگىنشە جاقىنداتۋعا تىرىسىڭىز. ەگەر ونىڭ دەڭگەيى %10 دان جوعارى بولسا، ول نىسانالى ماندەرگە جاقىنداعانشا جۇكتى بولۋعا تىرىسپاۋعا كەڭەس بەرەمىز»، - دەيدى بالنۇر سۇلتانوۆا.

سونداي-اق، ەندوكرينولوگ قانت ديابەتىمەن اۋراتىن ايەلدەرگە ءبىرقاتار ۇسىنىس ايتتى.

«ەگەر سىزدە قانت ديابەتى بولسا جانە جۇكتى بولعىڭىز كەلسە، كۇنىنە 5 م گ فولي قىشقىلىن جۇكتىلىكتىڭ 12-اپتاسىنا دەيىن قابىلداۋ كەرەك. فولي قىشقىلىن قابىلداۋ بالانىڭ ومىرتقاسىنىڭ ىدىراۋى جانە ديابەتتىك فەتوپاتيا سياقتى تۋا بىتەتىن اقاۋلاردىڭ دامۋىن بولدىرماۋعا كومەكتەسەدى. ەگەر قانت ديابەتىن باقىلاۋ ءۇشىن دارىلەر قابىلداساڭىز، ينسۋلين ينەكتسياسىنا اۋىسۋىڭىز كەرەك. جۇكتىلىك كەزىندە قانداعى گليۋكوزانى ءجيى باقىلاۋ قاجەت، ويتكەنى جۇكتىلىك كەزىندە جۇرەك اينۋى مەن قۇسۋ ونىڭ دەڭگەيىنە اسەر ەتۋى مۇمكىن. دارىگەر نەمەسە اكۋشەر بۇل تۋرالى كەڭەس بەرە الادى»، - دەدى بالنۇر سۇلتانوۆا.

سونىمەن قاتار، جۇكتىلىك كەزىندە ديابەتتىك رەتينوپاتيا بەلگىلەرىن انىقتاۋ ءۇشىن كوزدى ۇنەمى تەكسەرۋ قاجەت. ەگەر ول ەرتە انىقتالسا، ونى ەمدەۋگە بولادى. سيكلوسكوپيا جاسالۋى كەرەك.