جاستار ءجيى جىبەرەتىن 5 قارجىلىق قاتەلىك

استانا. قازاقپارات - بالالىق شاقتىڭ بەيقام الەمىنەن ەرەسەك ومىرگە كوشۋ جاستار ءۇشىن ءاردايىم اۋىرتپالىقسىز بولا بەرمەيدى، اسىرەسە قارجى جاعىنان.

جاستارعا ءتان ماكسيماليزم، بارلىعىنا بىردەن قول جەتكىزۋگە دەگەن ۇمتىلىس كوبىنە قارجىلىق قاتەلىكتەرگە اكەلەدى

Fingramota.kz جاستار ءجيى جىبەرەتىن 5 قارجىلىق قاتەلىكتى ۇسىندى.

1. قاتەلىك. بيۋجەتتى ءتيىمسىز جوسپارلاۋ

ۇرپاق نەعۇرلىم جاس بولسا، سوعۇرلىم ولار اقشانى ۇنەمدەۋ نەمەسە كەيىنگە قالدىرۋ تۋرالى از ويلايدى. جاستار شاكىرتاقىنى نەمەسە جالاقىسىن بىرنەشە كۇندە جۇمساپ تاستاپ، قالعان كۇندەر ايدىڭ سوڭىنا دەيىن ولمەستىڭ كۇنىن كورۋى مۇمكىن. بۇل كوبىنەسە بيۋجەتتى ءتيىمسىز جوسپارلاۋدىڭ سالدارى. سوندىقتان، جاس بۋىن وكىلدەرىنە، اسىرەسە ستۋدەنتتەرگە ەڭ الدىمەن ءوز شىعىستارىن باقىلاۋدى ۇيرەنۋ كەرەك.

كەڭەس: ءوز كىرىسىڭىزدى (شاكىرتاقى، اتا-انا بولەتىن قاراجات، جالاقى جانە ت. ب.) مىندەتتى جانە قوسىمشا شىعىندارعا ءبولىڭىز. مىندەتتى شىعىنداردان كەيىن وزىڭىزدە قانشا اقشا قالاتىنىن ەسەپتەڭىز، ولارعا ازىق-تۇلىك، كوممۋنالدىق قىزمەتتەر، ينتەرنەت جانە موبيلدىك بايلانىس، كولىك شىعىستارى جاتادى. قالعان قاراجاتتى كۇندەلىكتى شىعىستارعا بولىڭىز.

جەكە قاراجاتىڭىزدى باقىلاۋ - ءتيىمدى جيناقتاۋعا، ۇتىمدى جۇمساۋعا جانە جاقسى ءومىر سۇرۋگە جاسالعان العاشقى قادام.

2. قاتەلىك. تابىسىنان ارتىق جۇمساۋ

زاماناۋي جاستار تاۋارلار مەن قىزمەتتەردى بەلسەندى تۇتىنۋشىلار بولىپ تابىلادى. وكتەم جارناما، ءار ءتۇرلى ماركەتينگتىك امالدار، الەۋمەتتىك جەلىلەردەگى ادەمى ءومىر ناسيحاتى - وسىنىڭ ءبارى جاستاردى «ترەندتە بولۋعا» جانە سوڭعى ۇلگىدەگى گاجەتتەر، برەند زاتتار ساتىپ الۋعا، تانىمال مەكەمەلەردە ۋاقىت وتكىزۋگە يتەرمەلەيدى. اقشا جەتىسپەگەندىكتەن جاستار كوبىنەسە تۇتىنۋشىلىق كرەديتتەر رەسىمدەۋ ارقىلى «قارىزعا ءومىر سۇرەدى».

الايدا، تابىستى بولۋ نەمەسە تابىستى بولىپ كورىنۋ ءبىر نارسە ەمەس. تابىس ەلەسى سوڭىندا كەز كەلگەن ادامدى «كرەديت شىرماۋىنا» تۇسىرەدى.

كەڭەس: قاراپايىم ءبىر شىندىقتى ەستەن شىعارماعان ءجون: كرەديت - بولاشاق ەسەبىنەن ءومىر ءسۇرۋ! قارىز رەسىمدەمەس بۇرىن سىزگە بۇل شىنىمەن قاجەت پە، وزىڭىزگە جاۋاپتى قارجىلىق مىندەتتەمە جۇكتەۋگە دايىنسىز با، سونى ويلانىڭىز. جەكە بيۋجەتكە قوسىمشا اۋىرتپالىق تۇسىرمەۋگە تىرىسىڭىز. ەلىكتىرەتىن جارناماعا ەرمەڭىز. ەشبىر جاعدايدا «ەسكىنى» وتەۋ ءۇشىن جاڭا كرەديت الۋدىڭ قاجەتى جوق، ونىڭ ۇستىنە تالاپتارى ايتارلىقتاي جاقسى بولماسا.

3. قاتەلىك. «رەزەرۆتىك قوردىڭ» بولماۋى

جاستار بۇكىل ومىرلەرى الدا دەپ سانايدى جانە قارجىلىق قاۋىپسىزدىك جاستىقشاسى تۋرالى ويلاعىلارى دا كەلمەيدى. الايدا جەكە رەزەرۆتىك قوردى قالىپتاستىرۋدى جاستايىنان باستاسا، وندا بولاشاقتا ءوزىن كۇتپەگەن قارجىلىق قيىندىقتاردان قورعاۋعا بولادى. جەكە رەزەرۆتىك قور - بۇل بەلگىلى ءبىر اقشا قاراجاتىنىڭ سوماسى، ول كەم دەگەندە 6 ايلىق شىعىنداردان قۇرالۋى ءتيىس، ءبىر جىلدىق بيۋدجەتتەن تۇرسا ءتىپتى جاقسى.

كەڭەس: جيناقتاۋدىڭ ەڭ ءتيىمدى ادىستەرىنىڭ ءبىرى - بۇل بانكتىك سالىم اشۋ. ەگەر ءسىز 20 جاسىڭىزدا، مىسالى، اي سايىنعى جالپى كىرىسىڭىزدىڭ كەمىندە %10 جيناي باستاساڭىز، وندا بەلگىلى ءبىر كەزەڭگە دەيىن قاۋىپسىزدىك جاستىقشاسىن قۇرا الاسىز.

4. قاتەلىك. ناقتى ماقساتتاردىڭ بولماۋى

جاستار كوپ جاعدايدا ساياحاتتاۋدى نەمەسە ءوز بيزنەسىن اشۋدى ارماندايدى. الايدا، ارماندار جۇزەگە اسۋى ءۇشىن قارجىلىق جوسپار قۇرىپ، ونى ورىنداۋ كەرەك. قاعازعا نەمەسە گادجەتتەگى قوسىمشاعا ءوز ماقساتىڭىزدى ءارى وعان قول جەتكىزۋ تاسىلدەرىن جازىڭىز دا، ناقتى مەرزىمدەرىن كورسەتۋدى ۇمىتپاڭىز. بالكىم، باستاپقى كەزەڭدەردە ءوزىڭىزدى مەجەلەنگەن جولمەن جۇرگىزۋ قيىنعا سوعۋى مۇمكىن. الايدا تارتىپتىك ءتاسىل قولدانساڭىز، ءسىز ءوز ارمانىڭىزعا ءبىر قادام جاقىن بولاسىز.

كەڭەس: ءوز ماقساتىڭىزدى ىسكە اسىرۋعا قاتىستى ەگجەي-تەگجەيلى جوسپار قۇرىپ، وعان قول جەتكىزۋ ءۇشىن اي سايىن جينايتىن سومانى كورسەتىڭىز. ءوز قارجىلىق مۇمكىندىكتەرىڭىزدى ەسكەرۋدى ۇمىتپاڭىز. قاراجات جيناۋ بارىسىندا جاپپاي ۇنەمدەۋ رەجيمىنەن اۋلاق بولىڭىز. «كورپەڭە قاراي كوسىلۋ» قاعيداتىن ەستەن شىعارماعانىڭىز دۇرىس. الايدا، كەيدە ءوزىڭىزدى قۋانتىپ، ماراپاتتاپ وتىرۋدى دا ۇمىتپاعان ءجون. ويىن-ساۋىققا، مىسالى، كينوعا نەمەسە كافەگە جۇمسايتىن قاراجاتىڭىزدى بيۋجەتىڭىزدىڭ شەڭبەرىنەن اسىرماي، الدىن الا جوسپارلاپ قويىڭىز.

5. قاتەلىك. ءبىر مەزەتتىك تابىسقا سەنۋ

قازىرگى جاستار تەحنولوگيالىق پروگرەستەن قالماي، IT سالاسىندا ابدەن شىڭدالعان بولسا دا، ولار ءوز سەنگىشتىگىنەن جانە مۇقياتتىلىق تانىتپاۋىنان الاياقتاردىڭ ارباۋىنا ءجيى ءتۇسىپ قالىپ جاتادى ءارى ولاردى قارجىلىق پيراميدالارعا تارتۋ دا وڭايىراق. الاياقتار جاستاردى ءوز قارجىلىق قۋلىقتارىنا دەلدال رەتىندە تارتۋى مۇمكىن نەمەسە ولارمەن سەنىمگەرلىك قاتىناس ورناتىپ، ورتاق كاسىپ اشۋدى نەمەسە كىرىسى جوعارى ينۆەستيتسيالىق جوباعا قاتىسۋدى ۇسىنۋى مۇمكىن.

كەڭەس: دەلدالدىق، كىرىسى شامادان تىس ونلاين-جوبالار ارقىلى تابىسى جوعارى ۇسىنىستارعا نەمەسە بارىنشا كوپ ادام تارتۋ ارقىلى اقشا تولەنەدى دەپ ۋادە بەرەتىن نەمەسە ينۆەستيتسيالاردىڭ قايتارىلاتىنىنا كەپىلدىك بەرەتىن كومپانيالارعا سەنبەڭىز. مۇنداي ۋادەلەردى بەرەتىن تەك - الاياقتار. كەز كەلگەن اقپاراتتى ۇنەمى تەكسەرىپ، بارىنشا قىراعىلىق تانىتىڭىز!

جاس كەزىڭىزدە جاسايتىن تاڭداۋىڭىز ءسىزدىڭ بولاشاقتاعى قارجىلىق ءال-اۋقاتىڭىزعا ۇلكەن اسەر ەتۋى مۇمكىن. ەگەر ءسىز جيىرما جاسىڭىزدا اقشانى ويلانباي جۇمساپ، كرەديت كارتالارىن پايدالانىپ، تولەمدەردىڭ مەرزىمىن كەشىكتىرىپ، كرەديتتىك تاريحىڭىزدى ءبۇلدىرىپ الساڭىز، وندا ورتا جاسقا كەلگەندە قارىزدارىڭىز «تاۋ» بولىپ جينالىپ قالادى.

ءبىراق ەگەر ءسىز بيۋجەتىڭىزدى ۇتىمدى جوسپارلاپ، كىرىستەرىڭىز بەن شىعىستارىڭىزدىڭ اراسىنداعى تەپە-تەڭدىكتى ساقتاپ، ينۆەستيتسياعا سالىپ، الاياقتاردىڭ ارباۋىن تانۋدى ۇيرەنسەڭىز، وندا بولاشاعىڭىز ءۇشىن الاڭداپ، ۋايىمداماساڭىز دا بولادى.