سۋ ءۇشىن كۇرەس: قاقتىعىستار تۋىنداۋى مۇمكىن 5 ايماق

استانا. قازاقپارات - دۇنيەجۇزىندە سۋ قورى ازايعان سايىن، ميلليونداعان تۇرعىنى بار بىرنەشە ايماقتا جاڭا قاقتىعىستاردىڭ تۋىنداۋى ىقتيمال، دەپ حابارلايدى قازاقپارات Euronews-كە سىلتەمە جاساپ.

جەر شارىنداعى سۋ رەسۋرستارى ازايىپ كەلەدى، ءبىرقاتار ايماق تۇشى سۋدىڭ قاتتى تاپشىلىعىنا تاپ بولۋى مۇمكىن. دەمەك، قارۋلى قاقتىعىستاردىڭ زور قاۋپى بار. Water Peace and Security partnership (WPS) ينستيتۋتىنىڭ ساراپشىلارى قاقتىعىستىڭ ناقتى قاي جەردە بولۋى مۇمكىندىگىن بولجاۋعا تىرىسادى.

1. كەنيا، ەفيوپيا جانە سومالي

بۇل ەلدەر ءتورتىنشى جىل قاتارىنان قۇرعاقشىلىقتى وتكەرىپ جاتىر. سونىمەن قاتار، ۋكرايناداعى جاعداي ايماققا استىق يمپورتىنىڭ ازايۋىنا اكەلىپ سوقتىردى، كەم دەگەندە 18,6 ميلليون تۇرعىن دۇرىس تاماقتانبادى. «ايماقتا جالعاسىپ جاتقان نەمەسە جاڭا قاقتىعىستاردىڭ پايدا بولۋ ىقتيمالدىعى جوعارى»، - دەپ ەسكەرتەدى WPS.

2. وڭتۇستىك افريكا رەسپۋبليكاسى

كوپتەگەن عالىم اپتاپ ىستىق پەن جاۋىن- شاشىننىڭ بولماۋى «نولدىك كۇننىڭ» باستالۋىن جاقىنداتادى دەپ الاڭدايدى. ولار وڭتۇستىك افريكادا سۋ قويمالارى بوساپ، قالالاردىڭ تۇرعىندارى مۇلدەم سۋسىز قالاتىن كۇندى بەلگىلەي باستادى. WPS ەسكەرتۋىنشە، بۇل ايماقتا دا جالعاسىپ جاتقان نەمەسە جاڭا قاقتىعىستاردىڭ پايدا بولۋ ىقتيمالدىعى جوعارى.

3. يراك

ميلليونداعان يراكتىقتار ءۇشىن ومىرلىك ماڭىزى بار تيگر مەن ەۆفرات وزەندەرىندەگى سۋ قاۋىپتى تومەن دەڭگەيدە. مامىر ايىنىڭ سوڭىندا وتكەن جىلمەن سالىستىرعاندا % 60- عا ازايدى. بۇل ەلدىڭ اۋىل شارۋاشىلىعى مينيسترلىگىن سۋارمالى جەرلەردەگى ەگىندى ەكى ەسە ازايتۋعا ءماجبۇر ەتتى. يراك تۇركيا مەن يراننان وزەننىڭ جوعارعى اعىسىنان كوبىرەك سۋ جىبەرۋدى سۇراعانىمەن، وڭ جاۋاپ بولمادى.

فەدەرالدى دەڭگەيدە سۋ رەسۋرستارىن باسقارۋ جونىندە وكىمدەر قابىلدانعان، الايدى جەرگىلىكتى بيلىك ولاردى ەلەمەي، جاعدايدى ءوز بەتتەرىنشە شەشۋگە تىرىسىپ وتىر. بۇل قاقتىعىس قاۋپىن ارتتىرادى. ال- مۋتاننا پروۆينتسياسىندا شىلدە ايىندا جەراستى شاحتالارىنىڭ بىرنەشە جۇمىسشىسىنا شابۋىل جاسالدى. WPS بۇعان «الاڭداۋ كەرەك» دەپ ەسەپتەيدى.

4. يران جانە اۋعانستان

يران مەن اۋعانستاندى گەلمۋت وزەنى ءبولىپ تۇر. ايماقتاعى شيەلەنىس ەكى ەلدە دە سۋ قورىنىڭ شەكتەۋلىلىگىنە بايلانىستى ارتىپ كەلەدى. زەرتتەۋشىلەردىڭ پىكىرىنشە، اۋعان حالقىنىڭ % 90- دان استامى ازىق- تۇلىك تاپشىلىعىنان زارداپ شەگەتىنى دە اسەر ەتەدى.

5. پاكىستان جانە ءۇندىستان

جاقىندا پاكىستاندا جانە ءۇندىستاننىڭ كەيبىر اۋداندارىندا ءىرى سۋ تاسقىنى بولعانىمەن، وسى جىلدىڭ باسىندا ەكى ەل دە رەكوردتىق ىستىقتى باستان وتكەردى. ونىمدىلىكتىڭ تومەندەۋىنە بايلانىستى ءۇندىستان بيداي ەكسپورتىنا تىيىم سالدى، بۇل كورشىلەس ايماقتارداعى تاپشىلىقتى كۇشەيتتى. ءۇندىستان مەن پاكىستان اراسىنداعى شەكارالاس ايماقتارعا قاتىستى ماسەلە داۋلى بولعاندىقتان، ايماقتاعى جاعداي ونسىز دا تۇراقسىز. WPS ەسەبىنە سايكەس، ايماقتا جانجالدىڭ جالعاسۋى مەن پايدا بولۋ ىقتيمالدىعى جوعارى.

اۆتور:

سماعۇلوۆا ەركەجان