ادامدار قارتايعان شاقتا ءجيى وكىنەتىن 5 نارسە

استانا. قازاقپارات – جاستىق شاقتا ءومىردىڭ بار قىزىعى ءالى الدا دەپ ويلايمىز. سوندىقتان ءبىز قازىرگىگە اسا ءمان بەرمەي، كوپتەگەن ءىستى كەيىنگە قالدىرا بەرەمىز.

ءبىراق ەسەيگەندە وتكەن قاتەلىكتەردى ويلاپ، وكىنگەنشە ءوز ءومىرىڭىزدى قازىردەن باستاپ قولعا العان دۇرىس. ادامدار قارتايعان شاقتا نە نارسەگە ءجيى وكىنەدى؟

1. ۋاقىتتى بوسقا وتكىزگەنى ءۇشىن

كوپتەگەن ەرەسەكتەر ۋاقىتتى بوس جوعالتقاندارى ءۇشىن وكىنەدى. بىتپەيتىن كەشتەر، جالقاۋلىق، دۇرىس ەمەس قارىم-قاتىناس: ەرەسەكتەردىڭ كوپشىلىگى ءوز ۋاقىتتارىن ءتيىمدى قولدانباعاندارى ءۇشىن وكىنەدى.

ءسىز دە بۇل قاقپانعا تۇسپەۋىڭىز ءۇشىن باسىمدىلىقتاردى ءبىرىنشى كەزەككە قويىپ، قانداي ماقساتقا جەتكىڭىز كەلەتىنىن انىقتاڭىز. جاڭا تىلدەر ۇيرەنۋگە، سپورتقا، كىتاپ وقۋعا جانە ءسىزدى دامىتاتىن باسقا دا ىستەرگە كوبىرەك ۋاقىت بولۋگە تىرىسىڭىز.

2. از ساياحاتتاعانى ءۇشىن

كوپشىلىك قارت كىسىلەر جاس كەزىندە از ساياحاتتاعانى ءۇشىن وكىنەدى. ادام ساياحاتتاۋدان كەرەمەت اسەر الادى، وزىنە كوپتەگەن جاڭالىق اشادى، مۇلدەم وزگەشە تاجىريبە الا الادى. بۇل بەلگىلى ءبىر جاعدايلاردا عانا كەلەتىن ومىرلىك ساباقتار. ساياحاتتاۋ كوپ قاراجاتتى قاجەت ەتەدى دەگەن - قاتە تۇسىنىك.

3. دەنساۋلىققا ءمان بەرمەگەنى ءۇشىن

جاستىق شاقتا بىزگە اعزا ءارقاشان وسىنداي مىقتى، سىمباتتى جانە ساۋ بولاتىنداي كورىنەدى. ال نەگىزىندە دەنساۋلىقتى كۇتۋدى جاس كەزدەن باستاۋ كەرەك. بۇل ءسىزدىڭ ەسەيگەن كەزىڭىزدە دە جاقسى كورىنۋىڭىزگە جانە انىق ويلاۋىڭىزعا كومەكتەسەدى.

سپورتپەن اينالىسىڭىز، تازا اۋادا سەرۋەندەۋدەن باس تارتپاڭىز، جۇيەلى تۇردە دارىگەرلەرگە قارالىپ تۇرىڭىز، اۋىز قۋىسى دەنساۋلىعىنا اسا ءمان بەرىڭىز. بۇلار ءسىزدى تونۋستا ۇستاپ قانا قويماي، سونداي-اق قانداي دا ءبىر اۋرۋلاردى العاشقى كەزەڭىندە انىقتاپ، ۋاقىتىندا ەمدەۋگە مۇمكىندىك بەرەدى.

4. وتباسىعا جانە بالالارىنا جەتكىلىكتى ۋاقىت بولمەگەنى ءۇشىن

وتباسى - وسى ومىردەگى ەڭ كەرەمەتتىڭ ءبىرى. ءار ادام ءۇشىن ءوز وتباسى، ءوز ءۇيى ءارقاشان ونىڭ ءومىرىنىڭ ماڭىزدى ءبىر بولىگى بولىپ قالادى. ءبىراق كەي ادامدار وتباسىنىڭ قادىرىن كەش ءتۇسىنىپ جاتادى. ال بىرەۋلەر جاقىندارىن قاتتى جاقسى كورسە دە، ول جايلى اشىپ ايتا بەرمەيدى. الايدا كوپشىلىك ادام قارتايعان شاقتا ۋاقىتىندا جاقىندارىنا قاجەت قولداۋ مەن ماحاببات كورسەتە الماعانى ءۇشىن وكىنەدى.

5. جاقسى كورمەيتىن ىسپەن اينالىسقانى ءۇشىن

قارتايعان شاقتا كوپشىلىكتىڭ جانىن جەگىدەي جەيتىن نارسە - ولاردىڭ ءومىر بويى ۇنامايتىن ىسپەن اينالىسقانى.

ماماندىق تاڭداۋ - ءار ادامنىڭ ومىرىندەگى ەڭ قيىن جانە جاۋاپتى ساتتەردىڭ ءبىرى. ارينە، قازىر زامان بولەك: قاي كەزدە بولماسىن نە نارسەنى بولسا دا، ءتىپتى، ۇيدەن شىقپاي-اق ۇيرەنۋگە مۇمكىندىك بار. ءبىراق بۇل ماماندىق تاڭداۋدىڭ ماڭىزدىلىعىن جوققا شىعارمايدى. ەرەسەكتەر ءبىر كەزدەرى ءوز ارماندارىنان باس تارتىپ، اتا-اناسىنىڭ ايتقانىمەن جۇرگەندەرى ءۇشىن ءجيى وكىنەدى. سونىڭ سالدارىنان ءومىر بويى ءوز جۇمىسىن جاقتىرماي، كاسىبي تۇرعىدا ءبىر ورىندا «تۇرىپ قالادى».

ماماندىقتى ءوزىڭنىڭ قالاۋىڭا، بىلىمىڭە جانە داعدىلارىڭا قاراي تاڭدا. ءوزىڭنىڭ ومىرلىك جولىڭدى انىقتاۋ كەزىندە باسقالاردىڭ تاجىريبەسىنە ازىراق ءمان بەرىپ، ءوزىڭ ءۇشىن شىنىمەن دە ماڭىزدى نارسە تۋرالى ويلا.

جۇمىستا كۇنىڭىزدىڭ كوپ ۋاقىتى كەتەدى، ەگەر ول جۇمىستا ءوزىڭىزدى قاجەت سەزىنبەسەڭىز، قازىردەن باستاپ شارالار قولدانىپ، ارەكەت ەتىڭىز.

massaget.kz