الماتى مەتروسىنان 5 ميلليارد جىمقىردى دەگەن لاۋازىمدى باسشىلاردىڭ ءىسى سوتقا جەتتى

استانا. قازاقپارات - كولىك پروكۋراتۋراسى «مەتروپوليتەن» ك م ك بۇرىنعى باسشىلىعى، سونداي- اق مەردىگەر ۇيىمدار - «الماتى مەترو قۇرىلىس» ا ق جانە «اۆتوماتتاندىرۋ جانە تەحنولوگيالار سەرۆيسى» ج ش س لاۋازىمدى تۇلعالارىنا قاتىستى ءىستى تەرگەپ ءبىتتى.

قىلمىستىق ءىس ق ك 189-بابى 4-بولىگىنىڭ 2-تارماعى جانە 216-بابىنىڭ 3-بولىگى بويىنشا قوزعالعان بولاتىن، دەپ حابارلايدى قازاقپارات.

تەرگەۋ مالىمەتىنشە، كۇدىكتىلەر الماتى قالاسى مەتروپوليتەنىنىڭ جاڭا جەلىسىن سالۋ كەزىندە اۋقىمدى باسقارۋ فۋنكتسياسىنا يە بولعان.

ءدال وسى وكىلەتتىكتەر ولارعا قىلمىستىق جاعداي جاساۋعا جانە 5 ميلليارد تەڭگە ۇرلاۋعا مۇمكىندىك بەردى.

ول ءۇشىن ولار جالعان باعا ۇسىنىستارىن جيناقتاپ، ولاردىڭ نەگىزىندە قۇنى 10 ەسە جوعارى بولاتىن جابدىقتاردى ساتىپ الۋعا سمەتا جاسادى.

كەيىننەن جىمقىرىلعان قاراجاتتى «جالعان كاسىپورىندار» ارقىلى قولما- قولعا اينالدىردى.

جىمقىرعان اقشانى قايتارۋ ءۇشىن ءۇش قىمبات پاتەرگە، الماتى قالاسىنداعى ءبىر كەڭسەگە، الماتى وبلىسىنداعى جەر ۋچاسكەسىنە، ليۋكس اۆتوكولىكتەرىنە، برەندتىك ساعاتتارعا جانە كۇدىكتىلەردىڭ باسقا دا ءبىرقاتار اكتيۆتەرىنە تىيىم سالىندى.

بۇگىنگى تاڭدا قىلمىستىق ءىس سوتقا جولدانعان.