بەرىك ءبىلالوۆ گەنەرال- مايور اتاعىنان ايىرىلىپ، 5 جىلىن تۇرمەدە وتكىزەدى

استانا. قازاقپارات - استانا قالاسىنىڭ قىلمىستىق ىستەر جونىندەگى اۋدانارالىق سوتى پوليتسيا گەنەرال- مايورى بەرىك بىلالوۆكە ۇكىم شىعاردى، دەپ حابارلايدى قازاقپارات ءتىلشىسى.

سوت ۇكىمىنە سايكەس، ول قىلمىستىق كودەكستىڭ 190-بابى 4-تارماعىنىڭ 2-تارماقشاسىندا كوزدەلگەن قىلمىستىق قۇقىق بۇزۋشىلىق جاساۋعا كىنالى دەپ تانىلىپ، 5 جىلعا باس بوستاندىعىنان ايىرىلدى.

سونىمەن قاتار 10-جىل بويى مەملەكەتتىك قىزمەتتە، سوتتاردا، جەرگىلىكتى باسقارۋشى ورگانداردا، ۇلتتىق بانك پەن ونىڭ ۆەدومستۆولارىندا، مەملەكەتتىك ۇيىمداردا، كۆازيمەملەكەتتىك سەكتور سۋبەكتىلەرىندە جۇمىس ىستەي المايدى.

بەرىك ءبىلالوۆ قاۋىپسىزدىگى ورتاشا قىلمىستىق اتقارۋ جۇيەسى مەكەمەلەرىندە جازاسىن وتەيدى.

مۇنان بولەك، ودان زارداپ شەگۋشىلەرگە وتەماقى تولەۋ قورىنا 58340 تەڭگە ءماجبۇرلى تۇردە ءوندىرىپ الىنادى.

سونداي- اق قىلمىستىق كودەكستىڭ 49-بابى 2-تارماعىنا سايكەس، پرەزيدەنت اتىنا بەرىك ءبىلالوۆتى Ⅱدارەجەلى «داڭق» وردەنىنەن جانە پوليتسيا گەنەرال- مايورى جوعارى ارناۋلى شەنىنەن ايىرۋ تۋرالى ۇسىنىس ەنگىزىلەدى.

سىبايلاس جەمقورلىققا قارسى قىزمەت سقو قىلمىستىق اتقارۋ جۇيەسى دەپارتامەنتىنىڭ باسشىسى بەرىك بىلالوۆكە قاتىستى سوتقا دەيىنگى تەرگەۋ ءجۇرىپ جاتقانىن مالىمدەگەن ەدى.

ول بيىلعى 24-اقپاندا كۇدىكتى دەپ تانىلعان.