ارحيۆ جانە كىتاپحانا ماماندارىنا دايارلاۋعا ارنالعان گرانت 5 ەسە ۇلعايدى
بيىل «كىتاپحانا ءىسى، اقپاراتتى وڭدەۋ جانە ارحيۆ ءىسى» ءبىلىم بەرۋ باعدارلاماسى بويىنشا باكالاۆريات جوعارى ءبىلىمى بار مامانداردى دايارلاۋعا 2023-2024 وقۋ جىلىنا ارنالعان مەملەكەتتىك ءبىلىم بەرۋ تاپسىرىسىنىڭ كولەمى ءوستى. وسىعان دەيىن اتالعان ماماندىقتارعا 20 گرانت قانا بولىنگەن بولسا، بيىلعى ماۋسىم ايىندا ەنگىزىلگەن وزگەرىستەرگە سايكەس گرانت سانى 100 گە دەيىن ۇلعايدى.
بۇل مادەنيەت جانە سپورت مينيسترلىگىنىڭ عىلىم جانە جوعارى ءبىلىم مينيسترلىگىمەن بىرلەسكەن جۇمىسىنىڭ ناتيجەسىندە ىسكە استى. باستى ماقسات - مەملەكەتتىك ارحيۆتەر مەن كىتاپحانالاردىڭ كادرلىق الەۋەتىن بىلىكتى جاس ماماندارمەن كۇشەيتۋ.
بۇدان بولەك، مەملەكەت باسشىسىنىڭ تاپسىرماسىمەن حالىق تىعىز ورنالاسقان جانە جاڭادان قۇرىلعان وبلىستاردىڭ جاستارىنا ەلىمىزدىڭ جەتەكشى جوعارى وقۋ ورىندارىنا ءتۇسۋى ءۇشىن ارنايى مەملەكەتتىك ءبىلىم گرانتتارى قاراستىرىلىپ وتىر. وعان سايكەس، 5 وڭىرگە كىتاپحانا جانە ارحيۆ ماماندارىن دايارلاۋعا ارنالعان قوسىمشا 89 گرانت بەرىلدى. ونىڭ ىشىندە تۇركىستان وبلىسىنا - 52، شىمكەنت قالاسىنا - 14، جەتىسۋ وبلىسىنا - 12، ۇلىتاۋ وبلىسىنا - 1 جانە اباي وبلىسىنا - 10.
سونىمەن قاتار، 2023-2024 وقۋ جىلىنا ماگيسترلەردى دايارلاۋعا - 20، PhD دوكتورىنا 3 گرانت ءبولۋ جوسپارلانىپ وتىر.
«مادەنيەت جانە سپورت مينيسترلىگى ارحيۆ جانە كىتاپحانا سالالارىن بىلىكتى كادرلارمەن قامتاماسىز ەتۋ باعىتىندا ءبىرقاتار جوبالاردى جۇزەگە اسىرادى. ونىڭ ىشىندە كىتاپحاناشىلاردى شەتەلدە وقىتۋ نەمەسە تاعىلىمدامادان وتۋگە جىبەرۋ. سونداي-اق تۇراقتى تۇردە بىلىكتىلىك ارتتىرۋ ءىس-شارالارىن ۇيىمداستىرۋ. اتالعان ماماندىققا گرانت سانىنىڭ ۇلعايۋى جاس ماماندارمەن سالانىڭ كادرلىق الەۋەتىن كۇشەيتۋگە مۇمكىندىك بەرەدى»، - دەدى ق ر م س م ارحيۆ، قۇجاتتاما جانە كىتاپ ءىسى كوميتەتىنىڭ ءتوراعاسى قۋات بوراش.
