جىل باسىنان بەرى ەل ەكونوميكاسى 5 پايىزعا ءوستى - الىبەك قۋانتىروۆ

استانا. قازاقپارات- وسى جىلدىڭ 4 ايىندا ەل ەكونوميكاسى 5 پايىزعا ءوستى. بۇل تۋرالى ۇكىمەت وتىرىسىندا ۇلتتىق ەكونوميكا ءمينيسترى الىبەك قۋانتىروۆ ايتتى، دەپ حابارلايدى قازاقپارات ءتىلشىسى.

«بيىل 4 ايدا وتكەن جىلدىڭ قاڭتار- ساۋىرىمەن سالىستىرعاندا قازاقستان ەكونوميكاسى 5 پايىزعا ءوستى. ونىڭ ىشىندە ناقتى سەكتورداعى ءوسۋ - 4,8، ال قىزمەت كورسەتۋ سالاسىنداعى ءوسۋ 4,9 پايىزدى قۇرادى. نەگىزگى سالالاردىڭ بارلىعىندا وڭ ديناميكا بايقالىپ وتىر. اسىرەسە قۇرىلىس، ساۋدا، سونداي- اق اقپارات جانە بايلانىس ەڭ جوعارى ءوسىمدى كورسەتتى»، - دەدى مينيستر.

ونىڭ اتاپ وتۋىنشە، نەگىزگى كاپيتالعا سالىنعان ينۆەستيتسيالاردىڭ ءوسۋ قارقىنى 18 پايىزدى قۇرادى.

«ينۆەستيتسيا اعىنى كولىك جانە قويمالاۋدا - 39,3، اۋىل شارۋاشىلىعىندا - 26,5، جىلجىمايتىن مۇلىككە قاتىستى وپەراتسيالاردا – 10، سونداي- اق ونەركاسىپتە - 18,1، ونىڭ ىشىندە تاۋ- كەن ءوندىرۋ ونەركاسىبىندە - 17,3 جانە وڭدەۋ ونەركاسىبىندە - 7 پايىزعا ءوستى. وڭىرلەر اراسىندا ەڭ جوعارعى ءوسىم تۇركىستان، ماڭعىستاۋ، قىزىلوردا جانە باتىس قازاقستان وبلىستارىندا بايقالدى»، - دەدى الىبەك قۋانتىروۆ.