ازەربايجان-ارميان شەكاراسىندا اتىس بولىپ، 5 ادام زارداپ شەكتى
تاراپتار ءبىر- ءبىرىن اتىستى توقتاتۋ ءتارتىبىن بۇزدى جانە شەكاراداعى جاعدايدى ادەيى ۋشىقتىردى دەپ ايىپتاپ وتىر، دەپ حابارلايدى قازاقپاراتتىڭ مەنشىكتى ءتىلشىسى ەكى ەلدىڭ قورعانىس مەكەمەلەرىنە سىلتەمە جاساپ.
ازەربايجان قورعانىس مينيسترلىگىنىڭ مالىمەتى بويىنشا، 10-مامىر كۇنى كەشكە ارمەنيا قارۋلى كۇشتەرىنىڭ بولىمشەسى باسارگەچار اۋدانى زود اۋىلى جاعىنان ازەربايجان اسكەرىنە ءتۇرلى قارۋدان وق جاۋدىرعان.
«قارسى تاراپتىڭ كوزدەپ وق اتۋى سالدارىنان ازەربايجان ارمياسىندا مەرزىمىنەن تىس قىزمەت ەتىپ جۇرگەن اسكەري قىزمەتكەر ماحمۋدلۋ مۋسليم ۆيدادي وگلۋ باسىنان اۋىر جاراقات الدى» ، - دەلىنگەن مالىمدەمەدە.
جارالانعان اسكەري قىزمەتكەر شۇعىل اسكەري- مەديتسينا مەكەمەسىنە جەتكىزىلگەنى حابارلاندى. كەلبادجار اسكەري پروكۋراتۋراسى ازەربايجان اك اسكەري قىزمەتكەرىنىڭ جارالانۋىنا بايلانىستى قىلمىستىق ءىس قوزعادى.
ازەربايجان تاراپىنىڭ ايتۋىنشا، ارمەنيا اك ازەربايجانعا ءىرى كاليبرلى قارۋ مەن مينومەتتەن وق اتادى.
ال ارمەنيا قورعانىس مينيسترلىگى «11-مامىر، 06:00 دەن باستاپ ازەربايجان ا ك بولىمشەسى سوتك (زود) باعىتىندا ورنالاسقان ارميان بەكىنىستەرىنە زەڭبىرەكتەن جانە مينومەتتەن وق اتىلدى» دەپ سەندىرىپ وتىر.
07:00 دەگى دەرەك بويىنشا، ارمەنيا جاقتان ءتورت ادام جارالاندى. ارمەنيا قورعانىس مينيسترلىگىنىڭ 07.50 دەگى اقپاراتى بويىنشا شەكاراداعى اتىس جالعاسىپ جاتىر.
ازەربايجان اك «Bayraktar» ۇشۋ اپپاراتتارىن پايدالانعانى ايتىلىپ جاتىر.
قورعانىس مەكەمەسى ارميان جاقتان 10:25 تەگى اقپارات بويىنشا 4 ادام جاراقات العانىن حابارلادى.
«جارالانعان 2 اسكەري قىزمەتكەردىڭ جاعدايى قاناعاتتانارلىق بولسا، ەكەۋىنىكى - ورتاشا اۋىر. قازىرگى ۋاقىتتا جارالانعان قىزمەتكەرلەردىڭ ومىرىنە قاۋىپ ءتونىپ تۇرعان جوق» ، - دەلىنگەن حابارلامادا.
قازىر ارمەنيا قورعانىس مينيسترلىگى ارميان- ازەربايجان شەكاراسىنداعى شيەلەنىس ازايعانىن مالىمدەدى. ال ازەربايجان تاراپىنىڭ ايتۋىنشا، ارمەنيا قارۋلى كۇشتەرى شەكاراعا قوسىمشا كۇش، جەكە قۇرام مەن تەحنيكانى اكەلىپ جاتىر.
بۇعان دەيىن 11- ساۋىردە ەكى ەلدىڭ تۇيىسكەن جەرىندە قاتاڭ ۇرىس بولىپ، ەكى جاقتان 7 اسكەري قىزمەتكەر مەرت بولدى. تاراپتار ءبىر- ءبىرىن ارانداتتى دەپ ايىپتادى.