قازاقستاننىڭ 5 وڭىرىندە ەرتەڭ قار جاۋادى

استانا. قازاقپارات - سينوپتيكتەر 7- ساۋىردە قازاقستاننىڭ بەس وڭىرىندە قار جاۋىپ، كوكتايعاق بولۋى مۇمكىن ەكەنىن ەسكەرتتى، دەپ حابارلايدى قازاقپارات. «قازگيدرومەت» ر م ق اقپاراتى بويىنشا، استانادا جاڭبىر مەن قار تۇرىندە جاۋىن-شاشىن كۇتىلەدى.

اقمولا وبلىسىنىڭ سولتۇستىگى مەن شىعىسىندا 7- ساۋىردە جاۋىن-شاشىن (جاڭبىر، قار)، تۇمان، كوكتايعاق بولىپ، اۋا تەمپەراتۋراسى كۇرت تومەندەيدى. تۇندە 0-5 گرادۋسقا دەيىن ۇسىك جۇرەدى، كۇندىز 2-7 گرادۋس جىلى بولادى. وبلىستىڭ سولتۇستىك-باتىسىندا 1 گرادۋس ۇسىك جۇرەدى، تەمپەراتۋرا ودان ءارى تومەندەي بەرەدى.

8- ساۋىردە تۇندە وبلىستىڭ شىعىسىندا قار جاۋىپ، كوكتايعاق بولادى. سولتۇستىك-شىعىستان سوعاتىن جەل سولتۇستىك-باتىسقا اۋىسىپ، جىلدامدىعى سەكۋندىنا 15-20 مەترگە جەتەدى.

قوستاناي وبلىسىنىڭ سولتۇستىگى مەن شىعىسىندا 7- ساۋىردە جاۋىن-شاشىن، تۇمان، كوكتايعاق بولۋى ىقتيمال. جەلدىڭ جىلدامدىعى 15-20 م/س قۇرايدى. اۋا تەمپەراتۋراسى تۇندە 0-5 گرادۋسقا دەيىن كۇرت تومەندەيدى، كۇندىز 0-5 گرادۋس جىلى بولىپ، ارى قاراي سۋىتا بەرەدى.

پاۆلودار وبلىسىنىڭ سولتۇستىك، باتىس ايماقتارىندا 7- ساۋىردە جاۋىن-شاشىن، تۇمان بولجانادى. 8- ساۋىردە وبلىستىڭ سولتۇستىگى مەن شىعىسىندا قار جاۋىپ، تۇمان تۇسەدى، كوكتايعاق بولۋى مۇمكىن. جەلدىڭ ەكپىنى 15-20 م/س قۇرايدى. 8- ساۋىردە اۋا تەمپەراتۋراسى تۇندە 5-10 گرادۋسقا دەيىن تومەندەپ، كۇندىز -2 گرادۋستان 3 گرادۋس جىلىعا اۋىسادى. ودان ءارى تەمپەراتۋرا تومەندەي بەرەدى.

سولتۇستىك قازاقستان وبلىسىنىڭ وڭتۇستىگى مەن شىعىسىندا 7- ساۋىردە جاۋىن-شاشىن، تۇمان، كوكتايعاق بولادى. سولتۇستىكتەن، سولتۇستىك-شىعىستان 15-20 م/س جەل سوعادى، ەكپىنى كەي جەرلەردە 23-28 م/س جەتەدى.