قازاقستاندا ءولىم- ءجىتىم 5 پايىزعا ازايدى
بۇل تۋرالى ق ر دەنساۋلىق ساقتاۋ ءمينيسترى اجار عينيات ءمالىم ەتتى، دەپ حابارلايدى قازاقپارات ءتىلشىسى.
«مىندەتتى الەۋمەتتىك مەديتسينالىق ساقتاندىرۋ قورىنىڭ جۇمىسى حالىقتىڭ جالپى دەنساۋلىق جاعدايىمەن تىكەلەي بايلانىستى. سوندىقتان دا بۇگىنگى جيىندا ايتىلاتىن ۇسىنىس، پىكىر، يدەيا مەن وتىنىشتەر اتالعان سالانى جەتىلدىرە تۇسۋگە سەپتىگىن تيگىزەدى. پاندەمياعا بايلانىستى حالىق دەنساۋلىعىنىڭ ناشارلاعانىن بىلەسىزدەر. كوروناۆيرۋستىڭ سالدارىنان ەلىمىزدە ءولىم- ءجىتىمنىڭ كوبەيگەنىن دە حاباردارسىزدار»، - دەدى اجار عينيات ەلوردادا وتكەن مىندەتتى الەۋمەتتىك مەديتسينالىق ساقتاندىرۋ ماسەلەلەرىنە ارنالعان دوڭگەلەك ۇستەل بارىسىندا.
ءمينيستردىڭ ايتۋىنشا، حالىقتىڭ دەنساۋلىق جاعدايىنا اي سايىن ساراپتاما جاسالادى.
«بيىلعى جىلدىڭ 4-ايىنىڭ قورىتىندىسى بويىنشا ادام ءولىمى ازايدى. وتكەن جىلعا قاراعاندا ءولىم- ءجىتىم 5 پايىزعا تومەندەگەن. بۇگىندە ەپيدەميولوگيالىق جاعداي جاقساردى. ەلىمىز پاندەميادان كەيىن اياقتان قايتا تۇرىپ كەلەدى. وسى ورايدا حالىق دەنساۋلىعى كورسەتكىشى دە جاقسارىپ كەلەدى»، - دەيدى ول.
ايتا كەتسەك، نۇر- سۇلتان قالاسىندا ەلىمىزدە ەنگىزىلگەن مىندەتتى الەۋمەتتىك مەديتسينالىق ساقتاندىرۋ جۇيەسى قىزمەتىنە ارنالعان دوڭگەلەك ۇستەل ءوتىپ جاتىر. اتالعان شاراعا سالا ماماندارى مەن جاۋاپتى تۇلعالار قاتىسىپ م ءا م س- كە قاتىستى تۇيتكىلدى ماسەلەلەردى ورتاعا سالۋدا.
