ادىلەت مينيسترلىگىنە ساياسي پارتيا قۇرۋ تۋرالى 5 ءوتىنىش تۇسكەن

نۇر- سۇلتان. قازاقپارات - قازاقستاندا جۇرگىزىلىپ جاتقان ساياسي رەفورمالار اياسىندا پارتيالىق الاڭداعى تانىمال قايراتكەرلەر مەن توپتاردىڭ بەلسەندىلىگى ارتتى.

تەك سوڭعى ءۇش ايدىڭ ىشىندە عانا 3 جاڭا ساياسي پارتيانىڭ قۇرىلاتىندىعى بەلگىلى بولىپ وتىر، دەپ حابارلايدى قازاقپارات ءتىلشىسى.

ولار قازاقستان قۇرىلىسشىلارى وداعىنىڭ - «ەڭبەك»، تانىمال ساياسي قايراتكەر ءارى بيزنەسمەن بولات ءابىلوۆتىڭ - Bizdin Tandau جانە اقىن، قوعام قايراتكەرى ولجاس سۇلەيمەنوۆتىڭ - «قازاقستان حالىق كونگرەسى» پارتيالارى.

وسى جايتقا وراي «قازاقپارات» حالىقارالىق اقپارات اگەنتتىگى اتالعان جانە وزگە دە قۇجات ۇسىنعان پارتيالاردى تىركەۋ قاي كەزەڭدە تۇرعانىن ءبىلۋ ءۇشىن ق ر ادىلەت مينيسترلىگىنە ساۋال جولداعان بولاتىن.

«قازاقستاننىڭ حالىق كونگرەسى»، «Bizdin Tandau» جانە «ەڭبەك» پارتيالارىن قۇراتىن باستاماشى توپ تىركەۋشى ورگانعا جۇگىنگەن جوق»، - دەپ جاۋاپ بەردى ادىلەت مينيسترلىگىنەن.

ۆەدومستۆو مالىمەتىنشە، قازىرگى ۋاقىتتا «حالىق دەربەستىگى» رەسپۋبليكالىق ساياسي پارتياسىن تىركەۋ تۋرالى قۇجاتتار قارالىپ وتىر. بۇگىندە ساياسي پارتيانى قۇرۋعا قولداۋ بىلدىرگەن ازاماتتار ءتىزىمىنىڭ دۇرىستىعى تەكسەرىلىپ جاتىر. جالپى، جىل باسىنان بەرى ادىلەت مينيسترلىگىنە 5 باستاماشى توپ Namys ، ЕL Тiregi ؛ «العا قازاقستان»، «جاناشىر» ساياسي جانە «بايتاق» ەكولوگيالىق پارتيالارىن قۇرۋ ءۇشىن جۇگىنگەن. ءبىراق، اتالعان حابارلاندىرۋلار راستاۋسىز كەرى قايتارىلعان. ويتكەنى، باستاماشى توپ ۇسىنعان ءتىزىم «ساياسي پارتيالار تۋرالى» ق ر زاڭىنىڭ 6 جانە 8-باپتارى تالاپتارىنا ساي كەلمەيدى.

«وسى جاۋاپپەن كەلىسپەگەن جاعدايدا اكىمشىلىك راسىمدىك- پروتسەستىك كودەكستىڭ 91-بابىمەن شاعىمدانۋعا بولادى»، - دەپ اتاپ وتەدى ادىلەت مينيسترلىگى.

اۆتور: مارلان جيەمباي