الماتىداعى بالمۇزداق شىعاراتىن زاۋىتتا 5 ادام ۋلاندى

نۇر-سۇلتان. قازاقپارات - الماتىداعى بالمۇزداق سەحىندا توگىلگەن اممياكتان بەس ادام ۋلانىپ، اۋرۋحاناعا ءتۇستى، - دەپ حابارلايدى ك ت ك تەلەارناسى.

تەلەارنا مالىمەتىنشە، الماتىداعى «شين- لاين» كومپانياسىنىڭ سەحىندا مۇزداتۋ قۇرىلعىسىنان اقاۋ شىعىپ، 500 گرام اممياك اعىپ كەتكەن.

اۋاعا تاراعان حيميالىق قوسىندىنىڭ بۋىنا ۋلانعان بەس قىزمەتكەر الماتى قالالىق جەدەل شۇعىل كومەك كورسەتۋ اۋرۋحاناسىنا جەتكىزىلگەن. قازىر ۇشەۋى اۋىر حالدە جانساقتاۋ بولىمىندە جاتىر.

«بەس ناۋقاستىڭ بىرەۋىنىڭ جاعدايى تۇراقتى بولۋىنا بايلانىستى ستاتسيونارلىق ەمنەن باس تارتتى. ءتورت ناۋقاستىڭ ۇشەۋى قازىر جانساقتاۋ بولىمىندە جاتىر. جاعدايى اۋىر. قالعان ءبىر ناۋقاس توكسيكولوگيا بولىمىندە ەم الىپ جاتىر. جاعدايى ورتاشا. ناۋقاستاردا قۇسۋ، جۇرەك اينۋ بەلگىلەرى بولادى»، - دەدى الماتى قالاسى جەدەل شۇعىل كومەك كورسەتۋ اۋرۋحاناسى قابىلداۋ ءبولىمىنىڭ مەڭگەرۋشىسى باۋىرجان وماروۆ.

ايتا كەتەيىك، بۇل مەكەمەدە قىزمەتكەرلەر ءۇش اۋىسىمدا جۇمىس ىستەيدى. زاۋىت تاۋلىگىنە 60 تونناعا جۋىق بالمۇزداق شىعارادى. توتەنشە جاعدايدان كەيىن كومپانيا ىشكى تەرگەۋدى باستادى. پوليتسيا وقيعانىڭ ءمان- جايىن انىقتاپ جاتىر.

«جۇرگىزگەن تەكسەرىس قورىتىندىسى بويىنشا، اقاۋ فريزەردىڭ رەزەڭكە جابىندىسىنان شىققان. ءيىس شىعا باستاعاندا قىزمەتكەرلەر بىردەن سىرتقا جۇگىرگەن. وقيعا تاڭعى ءتورت شاماسىندا بولدى. التى ادامنىڭ جاعدايى ۋشىققاننان كەيىن، جەدەل جاردەم قىزمەتىن شاقىردىق. ەكەۋى اۋرۋحاناعا جاتۋدان باس تارتتى. وندىرىستە اممياك نەگىزىنەن مۇزداتقىش رەتىندە پايدالانىلادى»، - دەدى كومپانيا ديرەكتورى.