اتىراۋدا اجەسىنەن اداسىپ قالعان 5 جاسار بالا جوعالىپ كەتتى
وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، 12-ساۋىردە ساعات 19:30 شاماسىندا بالانىڭ جوعالعانى تۋرالى حابار بەرىلگەن.
«ەگدە جاستاعى ايەل №15-ۋچاسكەلىك پوليتسيا بەكەتىندەگى پوليتسيا ينسپەكتورلارىنا قوڭىراۋ شالىپ، ءوزىنىڭ 5 جاسار نەمەرەسىنىڭ قاس-قاعىم ساتتە جوعالىپ كەتكەنى جونىندە ارىزدانعان. كامەلەتكە تولماعان بالانىڭ اجەسى «مۇنايشى» شاعىن اۋدانىنداعى ازىق-تۇلىك دۇكەنىنە كىرگەن. سول كەزدە نەمەرەسى ويناپ كەتكەنى انىقتالدى»، - دەپ حابارلادى دەپارتامەنتتىڭ باسپا ءسوز قىزمەتى.
جوعالعان بالانى ىزدەۋ ءۇشىن بارلىق پوليتسيا ۋچاسكەسىنىڭ ينسپەكتورلارىنا باعىت- باعدار بەرىلدى. اسىرەسە، ادامدار كوپ جينالاتىن ورىندار، جاقىن ماڭداعى شاعىن اۋداندار تەكسەرىلدى. ىزدەستىرۋ ءىس-شاراسىن جۇرگىزگەن پوليتسەيلەر جوعالعان بالاقايدى گەولوگ ەلدى مەكەنىندەگى جاڭالى كوشەسىنىڭ بويىنان تاپتى.
بەس جاسار بالا كوشەدە جالعىز ءوزى جىلاپ كەلە جاتقان.
«باۋىر ەتىمىزگە بالايتىن بالانى جوعالتۋدان اسقان وكىنىش جوق. بالامىز جوعالعاندا، دارمەنسىز كۇيدە قالدىق. ءوزىمىز ىزدەستىرگەننەن ناتيجە شىقپادى. دۇكەندە ىلىنگەن جادىنامادا كورسەتىلگەن پوليتسيا ينسپەكتورلارىنىڭ تەلەفون نومىرىنە قوڭىراۋ شالدىم. پولتسەيلەر لەزدە جاۋاپ بەرىپ، جەدەل ىزدەستىرۋدى قولعا الدى. جوعالعان بالامىزدى تاۋىپ بەرىپ، وتباسىمىزعا ورالتقان №15-ۋچاسكەلىك پوليتسيا ينسپەكتورلارى، پوليتسيا كاپيتانى عيزاتوللا راحمەتوۆ پەن پوليتسيا لەيتەنانتى ءومىرزاق ماحانوۆقا شىن نيەتىممەن العىسىمدى بىلدىرەمىن. قينالعان كەزدە پوليتسيا قىزمەتكەرلەرىنىڭ قورعانىمىز بولاتىنىنا كوزىم جەتتى»، - دەيدى بالانىڭ اناسى گۇلجيحان حۋرەسوۆا.
ەسكە سالا كەتەلىك، بۇعان دەيىن اتىراۋلىق انا ءيت تالاعان بالاسىن اۋرۋحاناعا جەتكىزگەن پوليتسەيگە العىس ايتقانىن جازعان بولاتىنبىز.
