قازاقپارات كۇنتىزبەسى: 5- ءساۋىر
اتاۋلى كۇندەر
كوشى-قون پوليتسياسى كۇنى
1993-جىلدىڭ 5- ءساۋىرى كۇنى مينيسترلەر كابينەتى «قازاقستان رەسپۋبليكاسىنداعى پاسپورتتىق جۇيە تۋرالى ەرەجەنى» قابىلدادى.
وسىدان كەيىن پاسپورتتىق-ۆيزالىق قىزمەت قايتا قۇرىلدى. بۇل كوشى-قون پوليتسياسىنىڭ قۇرىلعان كۇنى بولىپ سانالادى. قىزمەتتىڭ قۇرىلىمى، مىندەتتەرى وزگەردى. دەگەنمەن، ونىڭ قازىرگى اتاۋى 1999-جىلى ەنگىزىلدى.
ەستە قالار وقيعالار
1920-جىلى بۋراباي كۋرورتى اشىلدى.
1920-جىلى عۇبايدوللا الىبەكوۆ (1871-1923) قازاقستاننىڭ ادىلەت مينيسترلىگىنىڭ تۇڭعىش كوميسسارى، قازريەۆكومعا مۇشە بولىپ سايلانىپ تاريحتا قالدى. عۇبايدۋللا الىبەكوۆ قازريەۆكومداعى مۇشەلىك مىندەتتەرىنەن باسقا تۇرعىنداردى ازىق-تۇلىكپەن قامتاماسىز ەتۋ، اقمولا، اقتوبە، اداي ۋەزدەرىندەگى توتەنشە وقيعالاردىڭ تەرگەۋ جۇمىستارىندا بەلسەندى قوعامدىق قىزمەتتەردى جۇرگىزدى.
1991 -جىلى وڭتۇستىك قازاقستان وبلىسىندا «جانۋبي كوزوگيستون» اتتى وزبەك تىلىندەگى گازەت العاش رەت جارىققا شىقتى. قازاقشا اۋدارعاندا «وڭتۇستىك قازاقستان» دەگەندى بىلدىرەدى. باستاپقىدا گازەتتىڭ اتاۋى «دۋستليك بايروگي» (دوستىق بايراعى) بولىپ بەكىتىلگەن. ال قازىرگى اتپەن 1998-جىلدىڭ قاڭتار ايىنان شىعا باستادى.
1996 -جىلى تاشكەنتتە قازاقستان، قىرعىزستان جانە وزبەكستان ۇكىمەتى باسشىلارى كەڭەسىنىڭ كەزەكتى ماجىلىسىندە جانارماي، ەنەرگيا جانە سۋ رەسۋرستارىن پايدالانۋ، ورتالىق ازيا اۋماعىندا گاز قۇبىرلارىن سالۋ جانە پايدالانۋ تۋرالى كەلىسىمگە قول قويىلدى.
1997 -جىلى ق ر پرەزيدەنتى نۇرسۇلتان نازاربايەۆ 31- مامىردى «ساياسي قۋعىن-سۇرگىن قۇرباندارىن ەسكە الۋ» كۇنى رەتىندە بەكىتۋ تۋرالى جارلىققا قول قويدى.
1997 -جىلى ورال قالاسىندا الاشوردا قايراتكەرلەرى جانشا مەن حالەل دوسمۇحامەدوۆتەرگە مەموريالدىق تاقتا ورناتىلدى.
2006 -جىلى قازاقتىڭ اباي اتىنداعى مەملەكەتتىك اكادەميالىق وپەرا جانە بالەت تەاترىندا «ناز» حالىق ءبيى ءانسامبلى قازاق ءبي ونەرىنىڭ تاريحىندا تۇڭعىش رەت قازاق كۇيلەرى جەلىسىمەن «تۇيعىندار» ءبي سپەكتاكلى قويىلدى. ءبيدى قويۋشىلار وسكەلەڭ جاسقا بۇل شىعارما ارقىلى ەلدىڭ تاريحى مەن مادەنيەتىن تۇسىندىرۋگە تىرىسقان.
بيگە ماحامبەتتىڭ «جۇمىر قىلىش»، ە. برۋسيلوۆسكييدىڭ «جەلدىرمە»، ا. جايىموۆتىڭ «شالقىما»، م. بەردىعۇلوۆتىڭ «كوك ءبورى»، ءا. قازاقبايدىڭ «جاپپاس قىلىش دومبىرا»، «تىلەپالدى»، ب. رىسپانبەتتىڭ «قىز ەلىك»، «تۇيعىندار» سەكىلدى تۋىندىلارىمەن قاتار، حالىق كۇيى «كەڭەس» پەن حالىق ءانى «دەدىماي-اۋ» اۋەنى پايدالانىلعان.
1999 -جىلى قۇرىلعان «ناز» حالىق ءبيى ءانسامبلى شارا جيەنقۇلوۆا اتىنداعى قازاق ءبيىنىڭ Ⅱ رەسپۋبليكالىق بايقاۋىنىڭ جەڭىمپازى. حالىقارالىق «شابىت» بايقاۋىنىڭ باس جۇلدەسى مەن قىتايدا وتكەن بايقاۋدىڭ التىن جۇلدەسىن يەلەنگەن. بۇل كۇندە قۇرامىندا 50 بالەت ءبيشىسى بار ۇجىم ءار ۇلتتىڭ 100 دەن استام ءبيىن مەڭگەرىپ وتىر.
2006 -جىلى اقتوبەدە تاريحي-ولكەتانۋ مۇراجايىنا سىيلىق رەتىندە اسىل تاستاردان جاسالعان قوجا احمەت ياساۋيدىڭ پورترەتى بەرىلدى. ياشما، كوك تاس سىندى ءتۇرلى ءتۇستى تاستاردىڭ كەسەكتەرىنەن توسەلگەن پورترەتتى ورسك قالاسىنىڭ سۋرەتشىسى سەرگەي بۋركۋتبايەۆ دايىندادى.
بۇنىڭ ەرەكشەلىگى پورترەتتىڭ دايىندالۋىندا قولدانىلعان تاستار قازاقستان، رەسەي، اۋعانستان جانە ت. ب. بىرنەشە ەلدىڭ اۋماعىنان جينالعان. سايكەسىنشە الەم ۇلتتارىنىڭ بىرلىگى مەن دوستىعىن بىلدىرەدى.
2010 -جىلى امەريكا قۇراما شتاتتارىنىڭ پرەزيدەنتى قازاقستان رەسپۋبليكاسى قورعانىس ءمينيسترىنىڭ ورىنباسارى، گەنەرال-لەيتەنانت بولات سەمبينوۆتى «قۇرمەت لەگيونى» مەدالىمەن ماراپاتتادى.
ناگرادانى ا ق ش ورتالىق قولباسشىلىعىنىڭ كومانديرى گەنەرال دەۆيد پەترەۋس تاپسىردى.
گەنەرال-لەيتەنانت بولات سەمبينوۆ ءوز كەزەگىندە قازاقستان مەن ا ق ش ءۇشىن ورتاق قاتەرلەرگە قارسى كۇرەستە، ەڭ الدىمەن، حالىقارالىق تەرروريزمگە قارسى كۇرەستە ءبىزدىڭ وفيتسەرلەر مەن ساربازدارىمىزدىڭ قوسقان ۇلەسىن اتاپ ءوتتى.
2011 -جىلى قاراعاندى مەملەكەتتىك تەحنيكالىق ۋنيۆەرسيتەتىندە RD- زەرتحاناسىنىڭ سالتاناتتى اشىلۋى بولىپ ءوتتى. بۇل قازاقستاندا وسىنداي دەڭگەيدەگى ءبىرىنشى جانە جالعىز جوبا. زەرتحانا اقپاراتتىق-كوممۋنيكاتسيلىق تەحنولوگيالار سالاسىن دامىتۋ ءۇشىن زاماناۋي حالىقارالىق ستاندارتتارعا سايكەس ءبىلىم ساپاسىن ارتتىرۋ جانە كادرلىق الەۋەتتى قالىپتاستىرۋ ماقساتىمەن اشىلدى.
2016 -جىلى الماتىداعى 2017-جىلعى قىسقى ۋنيۆەرسيادا حالىقارالىق ستۋدەنتتەر ويىندارىنا قاتىسۋعا تىركەلگەن ەلدەر سانى بويىنشا رەكورد ورناتتى.
2018 -جىلى استراحان وبلىسىنان قۇرمانعازى دومبىراسىنىڭ كوشىرمەسى اكەلىنىپ، الماتى قالاسىنداعى ىقىلاس اتىنداعى حالىق اسپاپتارى مۇراجايىنا تابىستالدى. بۇل سىيلىقتى مۇراجايعا 69 جاستاعى قازاقستاندىق جەڭىل اتلەتيكا جاتتىقتىرۋشىسى ەدىگە نابيەۆ تاپسىردى.
ول اسپاپتى قاراعايدان جاساعان. كوشىرمەنىڭ ءتۇپ نۇسقادان ەش ايىرماشىلىعى جوق جانە ءۇنى جاقسى شىعادى. استراحان وبلىسىنىڭ التىنجار اۋىلىندا ساقتالعان ءتۇپ نۇسقاسىندا قۇرمانعازىنىڭ قولتاڭباسى بار.
2019 -جىلى بايقوڭىر عارىش ايلاعىنان ۇشقان «پروگرەسس م س-11» جۇك كەمەسى حالىقارالىق عارىش ستانساسىنا ءتۇيىسىپ، جۇكتى وربيتاعا جەتكىزۋ جىلدامدىعى بويىنشا رەكورد ورناتتى (3 ساعات 21 مينۋت).
2019 -جىلى قاراعاندىلىق 36№ مەكتەپتىڭ «كەربەز» حورەوگرافيالىق ءانسامبلى يسپانيانىڭ لورەت-دە-مار قالاسىندا وتكەن «Dance factory» حالىقارالىق بايقاۋىنىڭ لاۋرەاتى اتاندى. بايقاۋدا الەمنىڭ 18 ەلىنەن 10-12 جاس ارالىعىندا 1000 ءبيشى قاتىستى.
«كەربەز» ءانسامبلى ەكى حورەوگرافيالىق كومپوزيا - «سىلقىلداق» قازاق ءبيىن جانە «حورەزم» وزبەك ءبيىن قويدى. قاتىسۋشىلار بايقاۋ قۇرىلتايشىلارى مەن ۇيىمداستىرۋشىلارىنان اتاۋلى ديپلومدار الدى. سونىمەن قاتار ۇجىمعا يسپانيا بيلىگىنەن قوسىمشا ديپلوم جانە ەلتاڭبالى قاعازداعى العىس حات بەرىلدى.
2020 -جىلى كوروناۆيرۋستىڭ تارالۋىمەن كۇرەس شارالارىنىڭ جۇزەگە اسىرىلۋى اياسىندا نۇر-سۇلتان قالاسىندا كوپبەيىندى مەديتسينالىق ورتالىقتىڭ نەگىزىندە جاعدايى اسا اۋىر ناۋقاستارعا مەديتسينالىق كومەك كورسەتەتىن «ەكستراكورپورالدىق مەمبرانالىق وكسيگەناتسيا قارقىندى تەراپياسىنىڭ رەسپۋبليكالىق ورتالىعى» قىزمەت ەتە باستادى.
ورتالىقتا «ۇلتتىق عىلىمي كارديوحيرۋرگيالىق ورتالىعى» ا ق- نىڭ جوعارى بىلىكتى رەانيماتولوگتارى مەن كارديوحيرۋرگتارى جۇمىس ىستەيدى. سونىمەن قوسا ولار وڭىردەگى دارىگەرلەرگە جاعدايى اۋىر ناۋقاستاردى ەمدەۋ بويىنشا كەڭەس بەرەدى.
