ارال تەڭىزىنىڭ قۇرعاپ قالعان بولىگىنە ەكى جىلدا 5 ميلليون ءتۇپ سەكسەۋىل ەگىلگەن - كوميتەت
بۇل تۋرالى Facebook-تەگى پاراقشاسىندا ورمان شارۋاشىلىعى جانە جانۋارلار دۇنيەسى كوميتەتىنىڭ باسپا ءسوز حاتشىسى ساكەن دىلداحمەت جازدى، دەپ حابارلايدى قازاقپارات ءتىلشىسى.
«2018-2020 -جىلدارى قازاقستان رەسپۋبليكاسىنىڭ ەكولوگيا، گەولوگيا جانە تابيعي رەسۋرستار مينيسترلىگىنىڭ ورمان شارۋاشىلىعى جانە جانۋارلار دۇنيەسى كوميتەتى كورەيا رەسپۋبليكاسىنىڭ كورەي ورمان قىزمەتى جانە بيو ءارتۇرلىلىكتى ساقتاۋ قورىمەن بىرلەسە وتىرىپ، ارال تەڭىزىنىڭ قۇرعاپ قالعان تۇبىندەگى 13,300 گ ا اۋماققا 5 ميلليون ءتۇپ سەكسەۋىل كوشەتىن وتىرعىزدى.
بۇل جۇمىس « قىزىلوردا وبلىسىنداعى ارال تەڭىزىنىڭ قۇرعاپ قالعان ءتۇبىن فيتو- ورماندى قالپىنا كەلتىرۋ» جوباسى اياسىندا جۇزەگە اسىرىلدى. وعان كورەيانىڭ ورمان قىزمەتى 1,7 ميلليون دوللار ينۆەستيتسيالادى»، - دەپ جازادى ساكەن دىلداحمەت.
ونىڭ حابارلاۋىنشا ارال تەڭىزىنىڭ قۇرعاۋىنان بۇرىنعى سۋ ايدىنىنىڭ 6 ميلليون گەكتاردان استامى بوساپ قالعان. جىل سايىن اۋاعا ارال تەڭىزىنىڭ قۇرعاعان تۇبىنەن 100 ميلليون توننادان استام تۇز، شاڭ مەن قۇم ۇشادى. كليماتتىق جاعدايدىڭ وزگەرۋىنىڭ داۋسىز بەلگىلەرى بار. سونىمەن قاتار جەلدىڭ اسەرىنەن پايدا بولاتىن تۇز بەن شاڭنىڭ قورشاعان ورتاعا ايتارلىقتاي زيان تيگىزەتىنى دە بەلگىلى.
«وسىعان بايلانىستى 1980- جىلدان باستاپ قازاقستان ورمانشىلارى ارال تەڭىزىنىڭ قۇرعاعان تۇبىنە سەكسەۋىل وتىرعىزۋ ارقىلى قۇم مەن تۇزدى داۋىلدارىنىڭ بارىنشا الدىن الۋدا. ارال تەڭىزىنىڭ قۇرعاعان تۇبىندە ورماندى قالپىنا كەلتىرۋ - ەكولوگيالىق جاعدايدى جاقسارتۋعا باعىتتالعان شارالار كەشەنىنە ەنگىزىلگەن. قىزىلوردا وبلىسىنىڭ ورمان شارۋاشىلىقتارى جىل سايىن 10 مىڭ گەكتاردان استام جەرگە سەكسەۋىل وتىرعىزادى. ونىڭ 6500 گەكتارى ارال تەڭىزىنىڭ قۇرعاعان تۇبىندە جاتىر. جوبانى عىلىمي تۇرعىدا قولداۋ اياسىندا ارال تەڭىزىنىڭ قۇرعاعان تۇبىندە كورەيا ۋنيۆەرسيتەتىنىڭ زەرتتەۋشىلەرى جاساندى ەكپەلەردىڭ توپىراق قاسيەتىنە اسەرى تۋرالى بىرەگەي زەرتتەۋلەر جۇرگىزدى»، - دەپ جازادى كوميتەت وكىلى.
ءبىر سەكسەۋىل بۇتاسىنىڭ تامىرى شامامەن 4 توننا قۇمدى ۇستاي الادى. ارال تەڭىزىنىڭ قۇرعاعان ءتۇبى ءۇشىن قازالىدا ارنايى سەكسەۋىل كوشەتتەرى وسىرىلەدى. ءتالىمباقتىڭ اۋدانى 32 گەكتار. جىلدىق ءونىمى 4 ميلليون سەكسەۋىلدەن اسادى. سەكسەۋىل ورماندارىنىڭ ءوسۋ اۋداندارىن ساقتاۋ جانە ولاردىڭ جويىلۋىنا جول بەرمەۋ ءۇشىن ورمان شارۋاشىلىعى جانە جانۋارلار دۇنيەسى كوميتەتىنىڭ بۇيرىعىمەن سەكسەۋىل ورماندارىندا 2023 -جىلدىڭ 31 - جەلتوقسانىنا دەيىن اعاش كەسۋگە، سونداي- اق رەسپۋبليكانىڭ ساۋدا ورىندارىندا سەكسەۋىل ساتۋعا تىيىم سالىنعان.
«ورتالىق ازياداعى سەكسەۋىلدىڭ كوبى قازاقستان اۋماعىندا ورنالاسقان. قازاق ورمان قىزمەتىنىڭ امال- ءادىسى - دالانىڭ شولگە اينالۋىمەن كۇرەستە ەڭ ءساتتى تاجىريبە سانالادى. جالپى 1980-2000 -جىلدار ارالىعىندا ارالدىڭ قۇرعاپ قالعان بولىگىندەگى 190 مىڭ گ ا اۋماققا سەكسەۋىل وتىرعىزىلعان»، - دەپ ءتۇيدى ساكەن دىلداحمەت.
اۆتور: ايان بەكەن ۇلى
