ياكۋت قىزى الماتىلىقتارعا شاڭقوبىزدى 5 كۇندە ۇيرەتپەك

الماتى. قازاقپارات - ادام مۋزىكالىق اسپاپتا ويناۋدى 5 كۇندە ۇيرەنىپ كەتە الادى. ياكۋت مۋزىكانتى يۋليانا كريۆوشاپكينا الماتىدا وتكىزىپ جاتقان شەبەرلىك ساباعىندا شاڭقوبىزدىڭ ەرەكشەلىگى تۋرالى ايتىپ بەردى، دەپ حابارلايدى قازاقپارات ءتىلشىسى.

الەمگە ايگىلى مۋزىكانت يۋليا كريۆوشاپكينا الماتىعا كەلدى. ول ءار ەلدە حومۋس، كومۋز، دورومب، پارمۋپپيل دەپ اتالاتىن شاڭقوبىز اسپابىندا ويناۋدى الماتىلىقتارعا ۇيرەتىپ جاتىر.

عالىمدار وسى كونە اسپاپتىڭ تاريحىنا كەلگەندە ءالى ءبىر تۇجىرىمعا كەلە الماي جاتىر. بۇل اسپاپ قاي ەلدە شىققانى بەلگىسىز. بۇل اسپاپتىڭ ءتۇرلى حالىقتا مىڭداعان اتاۋى بار.

شاڭقوبىزدى جاقسى مەڭگەرگەندەردىڭ ءبىرى - ياكۋتتار. شىعىس ءسىبىر حالقىنىڭ ويناۋ تەحنيكاسى ەرەكشە.

ەتنومۋزىكا كەشتەرىنىڭ جۇلدىزى، حالىقارالىق بايقاۋلاردىڭ لاۋرەاتى يۋليانا كريۆوشاپكينا ءوزىنىڭ حومۋسىمەن جارتى الەمدى شارلاپ، ءسىبىر مۋزىكاسىن تانىستىرىپ شىققان.

ول حومۋستىڭ سۇيەمەلدەۋىمەن وسۋوحاي، تويۋك، دەگەرەندى فولكلورلىق موتيۆتە ويناي الادى.

ونىڭ ايتۋىنشا، كەز- كەلگەن ادامعا شاڭقوبىزدا ويناۋدى 5 كۇندە ۇيرەتۋگە بولادى.

«ەڭ باستىسى ادامنىڭ ىنتاسى بولسا بولدى. ونىڭ مۋزىكانى سەزىنۋى قاي دارەجەدە؟ ىرعاق سەزىمى دامىعان با؟ سونى باقىلاپ العان سوڭ ول ادامعا ۇيرەتە باستاۋ كەرەك. بۇل عاجايىپ اسپاپتى كەز- كەلگەن ادام تەز مەڭگەرىپ كەتە الادى. ادام كۇندە جاتتىقسا، 5-10 كۇننەن سوڭ- اق شاڭقوبىزدا ساز ويناي الادى. كەيبىر ادامدار ءۇشىن وعان بىرنەشە جىل كەرەك. مەن 7 جاسىمان باستاپ ۇيرەندىم. ۇستازىم اياحان توبىنىڭ نەگىزىن قالاۋشى ءالبينا دەگتياريەۆا»، - دەدى يۋ. كريۆوشاپكينا.

قازىر يۋليانا الماتىدا 11 ادامعا شاڭقوبىزدا (حومۋس) ويناۋدى ۇيرەتىپ جاتىر. ولاردىڭ ىشىندە 4 ادام عانا كاسىبي مۋزىكانت بولسا، قالعانداردى اۋەسقويلار.

اۆتور: گۇلميرا عوسمانالي