قازاقستاندا جەتى ايدا 5 ميلليونعا جۋىق ادام اۋە قىزمەتىن پايدالانعان

استانا. قازاقپارات - قازاقستاندا 2018-جىلدىڭ قاڭتار-شىلدە ايلارىندا اۋە كومپانيالارى 4,6 ميلليون جولاۋشىنى تاسىمالدادى، دەپ حابارلايدى قازاقپارات ءتىلشىسى.

ق ر ينۆەستيتسيالار جانە دامۋ مينيسترلىگى ازاماتتىق اۆياتسيا كوميتەتىنىڭ فەيسبۋكتەگى پاراقشاسىندا جاريا ەتىلگەن اقپاراتقا سايكەس، 2018-جىلدىڭ 7 ايىندا اۋە كولىگىمەن جولاۋشىلار تاسىمالى 15 پايىزعا ءوسىپ، وسى ارالىقتا اۋە كومپانيالارى 4,6 ميلليون ادامدى تاسىمالداعان. ال وتكەن جىلدىڭ وسى كەزەڭىندە 4,0 ميلليون ادام اۋە كولىگىنىڭ قىزمەتىن پايدالانعان بولاتىن.

«بولجامدى مالىمەتتەرگە سايكەس، 2018-جىلدىڭ قاڭتار-شىلدە ايلارىندا قازاقستان رەسپۋبليكاسىنىڭ اۋەجايلارى 7,7 ميلليون ادامعا قىزمەت كورسەتتى. بۇل 2017-جىلعى وسى كەزەڭىمەن سالىستىرعاندا (6,9 ميلليون ادام) 11 پايىزعا ارتىق»، - دەپ اتاپ وتەدى كوميتەتتەن.