ۇلى دالا ويىندارى : الامان بايگە جەڭىمپازى 5 ميلليون تەڭگە ولجالادى
بيىلعى جىلى بۇل فەستيۆالدىڭ جالپى جۇلدە قورى 18 ميلليون تەڭگەنى قۇرادى. جارىس الماتىنىڭ يپپودرومىندا ەلىمىزدىڭ ءار وبلىسىنان كەلگەن سپورتشىلاردىڭ قاتىسۋىمەن وتكىزىلدى.
شاباندوزدار ات جارىسى، كوكپار، اۋدارىسپاق، تەڭگە ءىلۋ، جامبى اتۋ، قازاق كۇرەسى، قىز قۋۋ سىندى ۇلتتىق سپورت تۇرلەرى مەن ويىندارىنان سىنعا ءتۇستى.
فەستيۆالدىڭ اشىلۋ سالتاناتىندا ات سپورتى فەدەراتسياسىنىڭ وكىلدەرى مەن الماتى قالاسى اكىمىنىڭ ورىنباسارى ارمان قىرىقبايەۆ، الماتى قالاسى دەنە شىنىقتىرۋ جانە سپورت باسقارماسىنىڭ باسشىسى ءابىل دوڭبايەۆ قاتىستى.
«الماتى قالاسىندا جىل سايىن 3000 نان استام ءتۇرلى دارەجەدەگى سپورتتىق شارالار وتەدى. ونىڭ ىشىندە شوقتىعى بيىكتەردىڭ ءبىرى - بۇگىنگى «ۇلى دالا ويىندارى». ول ارنايى وتان كورعاۋشى كۇنى مەرەكەسىندە ۇيىمداستىرىلىپ وتىر. ەرتەڭ، وزدەرىنىز بىلەتىندەي، العاشقى رەت قالامىزدا بەلدەسۋدەن «حالىق بارىسى» اشىق رەسپۋبليكالىق ءتۋرنيرى وتەدى. بۇگىنگى كۇننىڭ وزىندە وعان 1000 نان استام پالۋان تىركەلدى» ، - دەدى ءوز سوزىندە ارمان قىرىقبايەۆ.
سالتاناتتى شارا بارىسىندا فەستيۆال قوناقتارى بيشىلەر، انشىلەر جانە كاسكادەرلاردىڭ ونەرىنە كۋا بولىپ، ارتىنشا ونەر بۇيىمدارى كورمەسىن تاماشالاپ، ساياتشىلاردىڭ قۇستارىمەن، اڭشىلىققا شىعاتىن تازى يتتەرمەن تانىس بولدى. سونىمەن قاتار، كەز كەلگەن قوناق توعىزقۇمالاق ويناپ، اسىق اتىپ، قوشقار كوتەرۋ مەن باعاناعا شىعۋدان سايىسقا ءتۇستى. جەڭىمپازدار باعالى سىيلىقتارعا يە بولدى.
سونداي- اق، شاباندوزدار جانە پالۋانداردىڭ جەڭىمپازدارى مەن جۇلدەگەرلەرى مەدال جانە اقشالاي سىيلىقتارمەن ماراپاتتالادى. جارىس قورىتىندىسى بويىنشا، اۋدارىسپاقتان ءوز سالماقتارىندا ازات ءجۇمادىلوۆ (60 ك گ) ، داۋلەت ەرەجەپبايەۆ (70 ك گ) ، مەيىربەك ىلەمباي (80 ك گ) ، تۇيمەبەك جۇماليەۆ (+90 ك گ) جەڭىمپاز اتاندى. قىز قۋۋ ويىنىندا ۋاقىت بويىنشا جەڭگەن مارلەن قانات پەن رامينا ديدار جۇبى بولسا، تەڭگە ىلۋدەن ەرنات ءمالىمباي ۇزدىك اتاندى. جامبى اتۋدان مەرگەندىك تانىتقان سايان قىستاۋبايەۆ بولدى.
بايگەلەر جارىسىندا جۇيرىكتەردىڭ قاتارىندا ۇزدىك بولعاندار: ۇشقىر بايگە (1000 م) جەڭىمپازى «ماندارين» اتى، يەسى امىركۇلوۆ. الامان بايگە (21 ك م) ۇتىپ العان «امانات» - يەسى ۇلان وماروۆ، جورعا بايگەدە (7 ك م) ءبىرىنشى كەلگەن «كوكجايلاۋ» - تۇرسىن سابازبەكوۆ، ال، قۇنان بايگەدە (9 ك م) «بولاشاق» - دىنمۇحامەت اسقار ۇلى.
بۇل جارىستا كوكپار ويىنى دا قوناقتاردىڭ قىزىعۋشىلىقتارىن وياتتى. تارتىستى دودادا جاڭادان قۇرىلعان الماتى قالاسى قۇراماسىن قوسقاندا ءتورت كوماندا قاتىسىپ، الماتىلىقتار جەڭىمپاز اتاندى. ولار استانا قالاسىن فينالدىق ويىندا 3:0 ەسەبىمەن ۇتتى. ءۇشىنشى ورىنعا جامبىل وبلىسىنىڭ كوكپارشىلارى جايعاستى.
ايتا كەتەر جايت، «ۇلى دالا ويىندارى» رەسپۋبليكالىق فەستيۆالى «سپورتتىق الماتى» جوباسى اياسىندا ۇلتتىق ات سپورتى فەدەراتسياسىنىڭ كومەگىمەن ءۇشىنشى جىل ۇيىمداستىرىلدى. جەڭىمپازدار مەن جۇلدەگەرلەر مەدالدار جانە اقشالاي سىيلىقتارعا يە بولدى. ەڭ جوعارى سىيلىق - 5 ميلليون تەڭگە الامان بايگە جەڭىمپازىنا بۇيىردى.
