اشحابادتا 5- ازيا ويىندارى اياقتالدى: قازاقستان - ءتورتىنشى ورىندا

استانا. قازاقپارات - تۇرىكمەنستان استاناسى اشحاباد قالاسىندا جاۋىنگەرلىك ونەر تۇرلەرى بويىنشا جابىق عيماراتتا وتكەن V ازيا ويىندارى بۇگىن ءوز مارەسىنە جەتتى، دەپ حابارلايدى قازاقپارات ءتىلشىسى.

ەكى اپتاعا سوزىلعان دودادا قازاقستاندىق سپورتشىلار 28 التىن، 28 كۇمىس، 40 قولا، بارلىعى 96 مەدال ەنشىلەپ، جالپى كوماندالىق ەسەپتە ءتورتىنشى ورىنعا تۇراقتادى.

باس جۇلدەنى جەرگىلىكتى تۇرىكمەن سپورتشىلارى قانجىعاسىنا بايلادى. ولار جالپى سانى 245 مەدال جەڭىپ الدى، ونىڭ 89 ى - التىن، 70 ءى  كۇمىس جانە 86 سى قولا. ەكىنشى ورىنعا قىتاي سپورتشىلارى ورنالاستى. ولاردىڭ ەنشىسىندە 42 التىن، 32 كۇمىس، 23 قولا، جالپى 97 مەدال بار. ءۇشىنشى ورىنعا 36 التىن، 23 كۇمىس، 59 قولا، بارلىعى 118 مەدالمەن يران قۇراماسى جايعاستى.

قازىر اشحابادتا V ازيا ويىندارىنىڭ رەسمي جابىلۋ سالتاناتى ءوتىپ جاتىر.

ەستەرىڭىزگە سالا كەتەيىك، بۇل دودادا ەل نامىسىن قورعاۋعا قازاقستاننىڭ 150 سپورتشىسى قاتىستى. ولار جارىستىڭ 17 تۇرىنەن سىنعا ءتۇستى.

اۆتور: كۇنسۇلتان وتارباي