مەكتەپ 5 كۇندىك وقۋ كۇنىن دەربەس ايقىنداۋى ءتيىس - ق ر ب ع م

استانا. قازاقپارات - ق ر ءبىلىم جانە عىلىم مينيسترلىگى جاڭا وقۋ جىلىندا ەنگىزىلگەن جاڭاشىلدىقتارعا قاتىستى تۇسىنىكتەمە بەردى، دەپ حابارلايدى قازاقپارات.

«مينيسترلىك تاراپىنان ءبىلىم بەرۋ نىساندارىنا قاتىستى تالاپتار بويىنشا باستاما جاسالىپ، وزگەرىستەر ەنگىزىلدى. ەندىگى ۋاقىتتا ساباق بۇرىنعىداي 45 مينۋت ەمەس 40 مينۋتقا سوزىلاتىن بولادى. ەكىنشى وزگەرىس - سانيتارلىق تالاپتان كۇندىك وقۋ جۇكتەمەسىن رەتتەيتىن نورما تولىقتاي الىنىپ تاستالدى. ەندى سانيتارلىق تالاپ اپتالىق ماكسيمالدى وقۋ جۇكتەمەسىن رەگلامەنتتەيدى»، - دەپ ءتۇسىندىردى مينيسترلىكتەن.

سونىمەن قاتار ءبىلىم جانە عىلىم مينيسترلىگى اپتالىق وقۋ جۇكتەمەسى دەگەن نەنى بىلدىرەتىندىگىن دە تارقاتىپ بەردى.

«ول 1 - سىنىپتان 11 - سىنىپقا دەيىن 22-دەن 39 ساعاتقا دەيىن بولادى. كۇندىك ماكسيمالدى وقۋ جۇكتەمەسىن ءاربىر مەكتەپ ونى قامقورشىلىق كەڭەسىمەن جانە اتا- اتالار كوميتەتىنىڭ كەلىسىمىمەن دەربەس انىقتايدى. وسىلايشا، جاڭا سانيتارلىق تالاپ 5 كۇندىك وقۋ اپتاسىن ەنگىزۋگە مۇمكىندىك بەرەدى»، - دەيدى مينيسترلىكتەن.

ۆەدومستۆو ءبىلىم بەرۋ جۇيەسىندەگى بارلىق كونسترۋكتيۆتى وزگەرىستەر بالالاردىڭ يگىلىگى ءۇشىن جاسالىپ جاتقاندىعىن اتاپ ءوتتى.

اۆتور: مارلان جيەمباي