تۇرعىندار 5 -ساۋىردەن باستاپ ءوز ەمحانالارىنا تىركەلۋلەرى ءتيىس

استانا. قازاقپارات- مىندەتتى الەۋمەتتىك مەديتسينالىق ساقتاندىرۋ جۇيەسىن ەنگىزۋگە دايىندىقتىڭ ءبىرى بۇگىن پىسىقتالدى.

ورتالىق كوممۋنيكاتسيالىق قىزمەتىندە ق ر دەنساۋلىق ساقتاۋ ءمينيسترىنىڭ ورىنباسارى لياززات اقتايەۆا ءساۋىردىڭ بەسىنەن باستاپ «ەمحاناعا تىركەل دە، ساقتاندىرۋ جۇيەسىندەگى مارتەبەڭدى انىقتا» دەپ اتالاتىن ناۋقان باستالعانىن حابارلادى. دەمەك تۇرعىندار بۇگىننەن باستاپ ماۋسىم ايىنىڭ اياعىنا دەيىن ءوز ەمحانالارىندا تىركەلۋلەرى ءتيىس.

 «الەۋمەتتىك ساقتاندىرۋ قورى» ۇ ا ق باسقارما ءتورايىمى ەلەنا باحمۋتوۆا:

«قازىردەن باستاپ ازاماتتاردىڭ قاي ساناتقا جاتاتىنىن ءبىلىپ العانى ابزال جانە جارنانى كىم تولەيتىنىن انىقتاعانى قاجەت. مىسالى، جۇمىس بەرۋشى مە، مەملەكەت ەسەبىنەن بە؟ الدە ءوز قالتاسىنان با؟ مىندەتتى الەۋمەتتىك مەديتسينالىق ساقتاندىرۋ تۋرالى زاڭعا ساي الەۋمەتتىك جاعىنان از قامتىلعان ساناتتاعىلار ءۇشىن مەملەكەت تولەۋى ءتيىس»، - دەدى.

ازاماتتاردى العاشقى مەديتسينالىق- سانيتاريالىق كومەك كورسەتۋ ۇيىمدارىنا تىركەۋ تۇراقتى نەمەسە ۋاقىتشا تۇراتىن جەرى بويىنشا نەمەسە ەركىن تاڭداۋعا ساي جۇرگىزىلەدى.

اجار تولەعاليەۆا، ق ر د س م مەديتسينالىق كومەكتى ۇيىمداستىرۋ دەپارتامەنتىنىڭ ديرەكتورى:

 - ايتا كەتەتىن جايت، مەديتسينالىق- سانيتارلىق العاشقى كومەك كورسەتەتىن ەمحانالارعا نەمەسە دارىگەرلىك امبۋلاتوريالارعا تىركەلۋگە كەلەسى جىلدان باستاپ قازاقستان رەسپۋبليكاسى ۇكىمەتىنىڭ بيۋدجەتى جانىنان جانە م ءا م س قورىنىڭ جانىنان تولەنەتىن مەديتسينالىق كومەككە قول جەتكىزۋگە بولادى.

www.24.kz