قازاقستاندىق پسيحولوگ بالالاردى 5 جاسقا دەيىن دە ەركەلەتپەۋگە كەڭەس بەردى

استانا. قازاقپارات - قازاقستاندىق پسيحولوگ ۆەنەرا تەلجان بالالاردى كەز كەلگەن جاستا ەركەلەتۋگە قارسىلىق ءبىلدىردى. ول بۇل ەركەلىكتىڭ زاردابىن اقىرى بالا دا، انا دا بىرگە تارتاتىنىن ايتىپ جاتىر.

بۇل تۋرالى «پەندەمىز عوي» باعدارلاماسىندا ايتىلدى.

«باي بالاسى» دەگەن ۇعىم قازاق قوعامىندا ەرتەدەن بار. ال بۇگىنگىنىڭ «اسانى مەن ۇسەنى» ەرتەگىدەي ءومىرىن الەۋمەتتىك جەلىدە ماقتانىشپەن جاريالاپ تۇرادى. كەيدە كەزدەيسوق كامەراعا ءتۇسىپ، ەرسى قىلىقتارى جۇرتتىڭ قىزۋ تالقىسىنا ءتۇسىپ جاتادى. وسى ورايدا، قازاقستاندىق پسيحولوگ بالالاردى بەس جاسقا دەيىن دە ەركەلەتپەۋگە كەڭەس بەردى.

«ءوزىم ۇلداردىڭ اراسىندا ەركەلەپ ءوستىم. بالالارىمدى دا ەركەلەتىپ، ماعان ايتپاق ويلارىن تۇسىنۋگە تىرىستىم. » بەسكە دەيىن بالاڭدى اكەڭدەي سىيلا، ون جاسقا دەيىن قۇلىڭداي جۇمسا، ون سەگىز جاسقا دەيىن دوسىڭداي سىرلاس»  دەگەن قازاقتا جاقسى ءسوز بار. بالانىڭ ەركەلىگى دە ءارتۇرلى بولادى. ءبىرى قىرسىق كەلسە، ەندى ەكىنشىسىنىڭ قىلىعى ءتاتتى كورىنىپ تۇرادى. مەن ورتانشى بالامدى قاتتى ەركەلەتتىم. قازىر نەمەرەلەرىمىزدى توبەمىزگە كوتەرەمىز. ەركەلەتپەسكە تاعى بولمايدى. ورتانشى بالام قازىر 53 جاستا. ءالى كۇنگە دەيىن ەركەلەتەمىن»، - دەيدى ءبۇبىش اجە.

پسيحولوگ ۆەنەرا تەلجان ءوز كەزەگىندە بالانى قاي جاستا دا ەركەلەتۋگە قارسى شىقتى. ماماننىڭ پىكىرىنشە، انا دا، بالا دا كەيىن وسى ەركەلىكتىڭ زاردابىن شەگۋى مۇمكىن.

«بالا 9 ايلىعىنان باستاپ جاقسى مەن جاماندى ايىرا باستايدى. قازىر بالالاردى بەس جاسىنا دەيىن ەركەلەتۋگە مەن مۇلدەم كەلىسە المايمىن. قازىر اتا- انا ءوزىنىڭ بالاسىن ءبىر پسيحيكالىق شارشىعا كىرگىزىپ قويادى. كەيىن ءوزى دە سول «كومفورت زوناسىنان» شىعا الماي جۇرەدى. ارتىنشا بالاسىن دا شىعارا الماي قينالادى. وسىدان ءتۇرلى استەتيكالىق نيەۆروزدار، سوسىن ءوزىنىڭ تۋعان اناسى بالاسىنا كومەكتەسە المايتىنداي جاعدايعا جەتەدى. بۇرىنعى قاتال تاربيەنى قازىرگى زامانعا الىپ كەلە المايتىنىمىز وتە وكىنىشتى»، - دەيدى ول.

Stan.kz